أصل الحكاية
الطاهر يونس شخصية ممتعة ، وتستمتع أكتر وإنت بتسمعو وهو بقول في كلمات متقاطعة ، لكن في النهاية بتستمتع بالعرض ، مع إنك لازم تسأل نفسك بعدها ( الزول ده مالو؟) ، أمبارح الراجل كان آخر إنبساطة من قرار لجنة الإستئنافات ( التحكيمية سابقا) ، وأخد راحته في الكلام لدرجة إنه بقي يقول في كلام عايز ( فهامة) ، كان ممكن اعذره لأنه فرحته مع الكاروري ، خلتهم مصدقين ومامصدقين حكاية إنه في قرار طلع ابطل شرعية مجلس الهلال .
ممكن أعذر بعض الصحفيين لجهلهم ، والأوهام والخزعبلات العايشين فيها ، وإنهم حاجة في الهلال ومؤثرين والكلام الفارغ الكتير البخدعوا بيهو روحهم ، مع إنهم عارفين إنها كضبة وكتييييير ممكن تكضب الكضبة وتصدقها ، لكن ماممكن أعذر واحد زي الطاهر يونس أو كاروري ، لأسباب كتيرة منها ( النفخة) المصيبة إنها بتطلع في النهاية علي الفاضي .
نقول الإستئنافات قالت المجلس ده ماشرعي ( مع إنها ماقالت) ، نفهم شنو لما الطاهر يونس وفي سكرة الفرحة يقول لن يكون هناك فراغ بعد ذهاب المجلس وسنتحمل المسؤولية .. إنت منو؟ وصفتك شنو؟ واحد من إتنين إما إنك مالي يدك شديد وعارف تمام التمام إنك جاي في التعيين ، ودي براها مصيبة ، أو إنك ماعارف أي حاجة ، لأنه مافي زول بطرح نفسه بالطريقة المهينة دي ، خلي الناس يجيبوك يرشحوك يعينوك ، لكن ماممكن ترشح نفسك وتعين نفسك وتقول أنا تحت الطلب . شينة . بس بتوري إنك لاهث للمنصب والمنصب مالاهث ليك .
كاروري ( فك آخره) مع إنه كان هادي ورزين لغاية قبل ( مايتخيل إنه قرار فقد المجلس للشرعية) ، وبدأ بتصريحات ( لابد ويجب) لابد ان يتخذ الوزير قرار سريعا بتكوين لجنة تسيير ، والمجلس أصبح منعدم ، ويجب أن يصدر قرار المجلس الجديد ، مافي فرق من الطاهر يونس ، حب غير عادي للسلطة والغريبة إنهم من السلطة للسلطة ، والهلال ضحية تقاطعات وصراعات ومصالح السلطة .
عندي إقتراح للكاروري والطاهر يونس ، المجلس ثبت إنه شرعي حسب القرار ، ونعذرهم إذا حصل شيء من الطشاش خلي القراية تكون بالمقلوب ، أقترح ينزلوا في الانتخابات التكميلية ( ماعارف التعبير ده صاح ولا ماصاح) ، واقصد إنتخابات إكمال المجلس في المقعدين الفاضيين ( نائب الرئيس والامين العام) ، ونشوف يمكن ينجحوا ويرجعوا ويادار مادخلك شر ، هم في النهاية عايزين مقعد ومنصب وده المقعد وده المنصب وده المجلس .
أمبارح الهلال غلب النيل إتنين يعني الدوري بقي علي بعد خطوتين ، ودي ماكويسة مع الطاهر والكاروري لأنه حاتبقي ليهم ميتة وخراب ديار يفوز الهلال بالدوري والمجلس يبقي شرعي ، الموضوع عندهم بكون أكبر من الإحتمال ، لكن ده قدرهم نعمل شنو ؟ قدرهم يمشوا العيد الهلال بطل والمجلس يعمل . حارة . عايزه ليها شربوت ظابط عشان تتنسي.
hassan faroog [hassanfaroog@hotmail.com]