بسم الله الرحمن الرحيم
سلكشن
سوق امدرمان العصر فيهو هدوء برغم ان الباعه اكثر من الجمهور , كل بائع يروج لسلعته بالطريقه التي يري انها جازبه , واحد مكوم لبسات اطفال في طبليه وكابيها كب , من مظهرها لو قالوا ليك دي ملابس اطفال غزه تصدق , الوان باهته بفعل التخزين او التهريب او الشمس , موديلات لا يذكر زمنها الا امهات اليوم , اقمشه لا تعرفها قطنيه ولا بتروليه ولا سلكيه ولا لاسلكيه ولا كيسيه نايلونيه , بس مكبوبه وسيدها يكورك بجنيه كل شئ بجنيه , جمع من النسوه يهبشن فيها ويختن ويمشن , مابشترن ,واحده قالت يا اخواتي الهدوم ديل زي المستعملات , نطه واحد في السوق قال ليها مستعملات لكن استعمال بره , قالت ليهو يمكن فيهن قحة الخنازير , قال ليها وافرضي , قحة الخنازير بتسوي لشفعنا شنو ؟ قالت ليهو عاد كيفن مابتسوي ؟ قال ليها لو بتسوي الحكومه ما كانت وقفت استيراد المصل , انت بتعرفي اكتر من الحكومه ولا حريصه علي اولادك اكتر من حرص الحكومه علي اولادك ؟ عاينت ليهو وقالت بعرفو عاد ومشت , وواحد تاني ماشي ساااااي في نص النا لا شغال بالناس ولا الناس شغاله بيهو , الفرق بينو وبين الناس في المشي ساااي ده بس , وواحده شايله طفل عمرو تلاته شهور وبتشحد , واحد زهجان ماعارف يتم العرس كيف وجاي السوق عشان يتم الشباشب من البرندات قال ليها انتوا وكت ماعندكم بتجيكم نفس تلدوا كيف ؟ قالت ليهو ما تفلفس فينا , كان مفلس امسك خشمك عليك وكسح , وواحد تاني فارش مساويك لو باعهم كلهم مابجيب حق صحن الفول ,وبتاع ورنيش يكتحك ويقول ليك ورنش , وصف حافلات واقف قافل الشارع بره الموقف وكلهم يكوركوا عربي عربي , البسمعهم يقول العربي نسف اسرائيل من الوجود , وواحد في الركن خاتي طبلية تسالي بارجلها الزي ارجل النعام ومكيس التسالي دقاااااق تقول تسالي نوووي ويقول ليك الكيس بميه , تقول ليهو ليه ؟ يقول ليك ده تسالي اصلي , كل السوق بقول اصلي , طيب التقليد ده الببيع فيهم منو ؟ المهم وواحد شايل بسكويتات في كرتونه غير متقيده بالزمن ولا تاريخ الانتاج , وزول شايل اقلام ناشف دمها ناشف وغيرهم كتير 0
المهم قريب المغرب جا واحد مدردق طبلية موز ويكورك , لكيلو بجنيه , بجنيه يامواطن . الاصلي ابو نقطه , مع انو العريس اليومين دي مالاقي نقطه و المهم بعد شويه قال اتنين بجنيه ونص , دايرين نبيع , برضو مافي زول هببو ليهو , قال بخمسميه , اتنين بالف , والحال ياهو نفس الحال , تلاته بالف وفرح اطفالك ارح علينا جااااي , والحال لم يتغير , اربعه بالف يا ناس , شيل وادي جيرانك , ولم يحضر تجاهه زول , برغم ان السوق مليان ناس وسامعين كلامو , ولان الموز من الفواكه سريعة التلف صاحبنا كان كل مايمر الوقت بتجرس اكتر , خمسه بالف ياناس , برضو نفس الحال , سته بالف يا الخليتوا الاكل ,
سلكتد
ممكن ناكل كلنا مع بعض لو حسينا ببعضنا , الشطه لأ 0
والي لقاء
سلك