اصل الحكاية
مشكلة بدوي الوزير مع الهلال فيها حاجة مهمة لازم نقيف عندها كتير وهي انه المشكلة الآن ( وحاليا وفي الوقت الحالي وبكل المفردات التي تؤكد المعني ) أصبحت بين الفيفا والحكومة ، يعني مجلس الهلال ماطرف في الموضوع لامن قريب ولامن بعيد ، إنتهي دور المجلس بمجرد وصول خطاب الفيفا للإتحاد ، وبمجرد تسليم الإتحاد العام الخطاب للوزير ، وبمجرد تسليم الوزير الاتحادي الخطاب للوزير الولائي ، من هذه اللحظة أصبح مجلس الهلال متفرج يتابع ( زنقة) الوزير .
بدوي الوزير قال او قيل علي لسانه في تصريحات صحفية انه سيخاطب الاتحاد العام ، ويخاطب عن طريقه الفيفا ليشرح الكيفية التي فقد بها مجلس الهلال شرعيته وفق النظام الاساسي للنادي ، الغريبة إنه بدوي تخطي الوزير الاتحادي وقرر يمشي الاتحاد العام عديل مع إنه خطاب الفيفا وصله عن طريق الوزير الإتحادي ، عشان كده الطبيعي يوضح رؤيته أول حاجه للوزير الاتحادي ، والاخير من موقع المسؤولية يقرر مايراه مناسبا ولا شنو يابدوي؟
عجبتني جراءة بدوي الوزير عندما تمسك بتكوين لجنة التسيير ، وقرر مقابلة الاتحاد العام لتقديم مبرراته للفيفا بعدم شرعية مجلس الهلال ، السؤال بياتو صفة؟ لو بدوي ركز شوية حايلقي نفسه كوزير خارج المشهد ، فالفيفا لم تعره
إهتماما ولم تخاطبه من الاصل لانها لاتتعامل مع الحكومات ، وعندما وجهت الاتحاد العام بمخاطبة الوزير كان المعني الوزير الاتحادي ، والاتحاد (شال) الخطاب واداهو الوزير ، يعني تهديد الفيفا موجه للوزير الاتحادي ، انت وين يابدوي ؟ ماموجود تخيل؟ عشان كده ماعندك صفة تخليك تجلس مع الاتحاد العام خليك من توضيح رؤيتك للفيفا ، لأنه بإختصار الاتحاد مابعرفك وبعرف الوزير الاتحادي وينتظر منه الرد .
ومفروض هنا يابدوي تسأل ليييييييه الاتحاد ماخاطبك بشكل مباشر؟ وقبلها ليه الفيفا ماوجه يخاطبوك ؟ لانك غير معترف بك ، تخيل؟ لازم تتخيل ، عشان كده مافي سبب واحد يخليك تعمل لجنة لترجمة خطاب الفيفا والرد عليه ، ده تعب ساكت لانه لو مشيت الاتحاد العام حايقول ليك انا اديتك خطاب؟ حاتقول شنووووو؟ افضل حاجة توفر التعب ده وترسل ردك للوزير الاتحادي الوصلك منه خطاب الفيفا ، شفت القصة صعبة كيف يابدوي ؟ يعني لو عندك كلام قولوا لوزيرك الاتحادي الجماعة ديل ماشايفنك ، وبعدين خلينا من ترتيب مرور الخطاب والاولوية في المخاطبة معقولة من الولاية للفيفا طوالي ده قفز بالزانة .
خليك انت يابدوي الولائي الوزير الاتحادي نفسه لايستطيع مخاطبة الفيفا ، الكلام كله عن طريق الاتحاد العام ، وانت عايز تقنعها إنه مجلس الهلال غير شرعي للأسباب كذا وكذا وكذا. تخيل ده آخر شيء ممكن تسمح بسماعه منك ، الكلام واضح يابدوي في طرفين في الكورة الاتحاد الوطني للبلد المحدد ( عندنا الاتحاد العام) والنادي ، إنت يابدوي الحكومة طرف ثالث ودي معناها جسم غريب ، وجودك في المنظومة غير مسموح بمناقشته ، عشان كده الا تناقش ناس اللجنة ، لكن الفيفا مستحيل لا ولن تستمع إليك ، والفيفا في الغالب بتطلب شيء واحد ( عدم التدخل الحكومي في الشأن الرياضي ) في البداية بتقول للاتحاد العام كلم الجهة المسؤولة لانه استمرار تدخلها سيترتب عليه عقوابات صارمة تجاه الكرة السودانية .
شفت كيف يابدوي مافي طريقة للشرح وتقول لي عايز تناقش وترد ليها وترد ليك ، إنت قايل الفيفا دي مفوضية ولا لجنة تحكيمية ، الحل واحد يابدوي حل المجلس وعين لجنة تسيير وننتظر ونشوف. قلت لي عايز تخاطب منو؟
hassan faroog [hassanfaroog@gmail.com]
/////////////
