بسم الله الرحمن الرحيم في السلك *ادب الهلال وثوابت الهلال واخلاق الهلال *عبارة بنسمعها كتير جدا *عبارة بتتكرر زي هلال الحركه الوطنيه *هلال كلارك الانجليزي الذي اسموهو هلال الحركه الوطنيه *المهم *قالوا ادب الهلال يمنع رجوع سيدا للهلال *وهاهي الاخبار تؤكد عودة سيدا بالمزيكا *ابشر يا روشا *لي فوق لي فوق *وان كان الخبر يجمل الخنوع بشتله صغيره *سيدا يعتذر للهلال وللجماهير ويطلب العوده بخطاب رسمي *يعتذر دي يخيل لي نوفمبريه ساي *عودة سيدا مثل عودة نميري *سيغني لها الشارع الهلالي *ايدناك بايعناك *يا هيثومي ايدناك *وعودة نميري سميت عليها المهندسين الحاليه *ذلك الحي الراقي بامدرمان *ونحن نعيد الكرة *ونسمي العرضه شمال بالعوده *طالما سقط الاسم عن ذلك الحي الذي تغير الي المهندسين *انا ساكن امدرمان حي العودة شمال (حي العرضه سابقا) *عودة هيثم محمولا علي اكتاف اخلاق الهلال وادب الهلال وثوابت الهلال *هلال الحركه الوطنيه *هلال الحركه الهيثميه *واذا سألأنا روشا عن اسباب تراجع الهلال وتقدم هيثم وتمدده *سيقول الجمل حيوان اليف *اجابتو حاتكون ماليها علاقه بالسؤال *المهم *اذا فشلت صفقة البرازيلي *كردنه متربص ليهو خمسه وعشرين يوم *باتنين ارجنتينيين الاتنين اولاد خالات ميسي *امسكوا الخشب *ايها الناس *تسجيلاتنا كلو يوم تثبت انها زي شراء خروف الضحيه *حانجيب خروف حانجيب خروف *عشان الشفع ما يزعلو *عشان الشفع يقولوا بابا جاب لينا خروف *المهم خروف *عمرو كم وحجمو كيف وجنسو شنو ومنو كم *مامهم *يخت لحم ما يخت لحم *مامهم *المهم يقول باع *والشفع يتصوروا معاهو بالموبايل *ويوقولوا لي اولاد الجيران بابا (داب لينا هروف ) *ودخلنا الزريبه علي هذا الاساس *اقصد دخلنا التسجيلات علي هذا الاساس *لكن صدقوني *في خرفان بتتضايق يوم الوقفه بالليل *نعمل شنو مع ديل *يمكن للصباح ما يصبحوا *نعمل زي بتاع البحر الخروفو يوم الوقفه قرب يموت *قام ضبحو وكتب عليهو تشاهد غدا ؟؟؟؟ *وهل صحيح وعدنا لعمر بخيت تمخض عن تخزينه في الاهلي ؟؟؟ *طب ليه !!!! *المهم *البقت بقت *والزمن الفضل ما بجيب خروف حر من مناطق الانتاج *السنه دي نضحي كده *كوارع سااااااي *نغمت الخروف بدري بدري *وندخلوا نعلقوا في الدولاب *عشان ناس الحله ما يشوفوا خروفنا ويضحكوا علينا *ايها الناس *ان تنصروا الله ينصركم *اها *نجي لي شمارات والي الخرتوم *جد لينا يا والينا *جابوا الجرايد وقروا لينا *-قالوا بنك السودان خصص لينا سبعه مليون دولار يا والينا *البركه الماخصخصها علينا *المهم خصص سبعه مليون دولار يا والينا *عشان يجيبوا بيها الدواء لينا *اسئلة بتحتاج اجابات يا والينا *شنو المارضنا قدر ده قول لينا ؟؟؟ *وده مرض شنو ده المابي يفوتنا ويخلينا *ومع ضمان استمرار المرض الفينا *هل بنضمن استمرار بنك السودان يدينا ؟ سلك كهربا ننساك كيف وزماااان درسونا وقالوا لينا الوقايه خير من العلاج ,,,والله يوقينا و يوفر السبعه مليون دولار لينا والي لقاء سلك b_silik@hotmail.com ///////////
