يا كسلا، يا الغُرَّه وفتيه
يا الزي جبالك وزي رجالك
شامخه ديمه
وزي حرايرك،
شهمه وأبيه،
مني ليك ببعت سلام
واحترام
شوقاً كتييييييير
ومليون تحيه.
ومن ولداً بعزك، يا البهية
ليك برسل كم وصيه.
فيها ما بخت أنا كلمه نيه
وما بتسمعي من جناك
قولة “بريه”
ولا بقول لك “كُر عليك”
أو أرضى منك
“ووب عليَّ”.
داير الكلام
منك وعنك
يبقى زي الرصاص
وكل السواعد
تتقلب بندقيه
بيها تحمي
حقك وعزك
وتمسكيه بي يداً قويه
بيها تكنسي كل الأسافل والأراذل
البيسووا الدين مطيه
البمرحوا وبيرتعوا
في حق العباد
وبينهشوا لحم الرعيه
يبرطعوا ويعربدوا
لا رقيب ولا حسيب
وفاكرين البلد
ليهم تكيه،
لو وطيت ضهرك بركبوك
ولو غمدت عيونك …
بياكلوك حيه.
إختاري ليحدو ركبك
القوي والأمين
وولي أمرك للتقي والنقيه
أعقليها وتوكلي
وبعدها أدعي ربك
يهوِّن عليك ويحفظك
من كل بليه.
مريم هزت النخله
عشان تنال
رطباً جنيا
وموسى بي عصاته
ضرب البحر
حتى ينجو من الأذيه،
المجد الرفيع تمنو غالي
والعز ما بيُشترى
بالقليلة أو الشويه.
خلي قاشك
يبقى طوفان
والبراعم تبقى أسنان
كل ثمارك تبقى بمبان
تولع التاكا وجبالها
وكرن يضج ويبقى بركان
عشان تطهري من الدنس
وتتحصني من كل رذيه.
مرضك يا بلد ما كنكشه
بل قتله سفله مكنكشين
فاقدين شرف بلطجيه
اشفي منهم، ابتريهم
تسلمي من العنا
وتعرفي العيشةً الرضيه.
المرض ما هو عيبه
والوبا ما بنعد خطيه
إلا السكات على العوج
والرضا بالهرج المرج
يا هو الدنيه
الما بيرضاها حر
ولا بتقبلها
ذات روح عليه.
خلي المصاب
يكون ليك طهور
وخلي الهباب
يصبح بخور
وبعدها يغشاك نور
يشمل يعم كل البريه
يمنح البصر الحديد
للعينه زي نفسه مليانه وسويه
والعينه فارغه طايره وزايغه
يحشيها رمداً معاه رماد
ومع العمى يكويها كيه
بعد كيه بعد كيه.
ihaimir@aol.com
//////////////////
