خارج النص
7 يوليو 2020م
قبل كم يُوم كدي كُنت قاعد أسمع واستمتع للكوميدي الساخر كرم البركل..
عندُو عمةً ليهُو.. تحب اللحم وفي اللحم الشَيِّ كمان..
يُوم راجلها شغال في كريمة.. رسل ليها مع عربات بدري كيلُو لحم فخدة..
ويا حليلُو مَمَنِّي نفسُوا بي دَسَم كاااااااااارب يجي يلقاهُو في الغَدِي قدَّامُو..
قامت هي المُغرمة بالشَيِّ قاااااالت كدي جابت كانُونها المُو خمج..
وقعدت فُوق الكيلُو دا صاوتتُو ومع فطيريات رهااااااااف قامتبُو تب.. ينفعها ويرقعها إن شاء الله..
قَشَّت خشيمها وحمدت ربها على النعمة دي…
أها راجلها جاء من السُوق.. الغداء يا وليَّة..
جابَتْلُو مُلاحْ ويكي يابسي بي كسري مُرَّة..
دا شنو يا حاجة؟؟ الغدي مالُو ويكي.. ناصر ود البدري ما جابلك اللحم قبيل؟؟؟
جابُو والله تجيهُو العافي في عضيماتُو..
غسَّلت اللحمة وغتيتها فوق الطربيزة دي..
دُوبين ما مشيت سقيت البهايم وجيت.. لقيت الكدِيسي المسنُوحة دي أكلتها..
والكِدَيْسي يا حليلة راقدي بيناتُن تسسسسسسسسمع في الحوار دا..
راجلها طلع نبيه.. هسَّع آ الحرم دارْ تقنِعِيني الكديسي الصغُويري دي أكلت كيلُو اللحم دا براها؟؟؟
كَبْ قام على المخزن عندو ميزان جابُو..
ختَّ الكديسي في كفَّة جابت ليها كيلُو بس..
إتلفت علي مرتُو.. أها آ الحرم،، الكديسي دي كلها فَدْ كيلُو..
بس النقُول دا الكيلُو الأكلتُو.. نان هي ذاااااااااتة وينها؟؟؟؟!!!!!
ما عارف ليه القصة دي ذكرتني.. الخرمجة الحاصلي في بلدنا اليومين دي..
إستبشرنا خير وخير كتير بهذه الثورة المُباركة.. ومَنِّينَا نفسنا إنها تقفِّل لينا كَرَكِّيَّات المُؤتمر الوطني المتمثلة في:
الريِّس ومساعدينُو.. بي مدراء مكاتبهم وسكرتارياتهم…
الريِّس ومستشارينُو.. بي مدراء مكاتبهم وسكرتارياتهم…
الريِّس ومدراء مكاتبُو.. بي شيوخُن الظاهرين والباطنيين!!!
تفريعات المؤتمر الوطني..
المجلس الوطني بي نوابُو الصاحين والنايمين..
مجالس الولايات التشريعية بي كامل مخصصاتهم!!!
مجمُوعة الجُوكُو جُوكُو من ناس هَأ وهَأ…
دا بالإضافة لي رواتب البشير الدولارية من عشرين مليون دولار إلى 7 مليون دولار!!!!!
والحمد لله رب العالمين الكَرَكِّيَّات دي كلها اتقفَّلت… طيب المفروض والمنطق يقول خيرها دا يتنزَّل علينا نحن المواطنين الغلبانين ديل؟؟ ولة مُو كدي؟؟؟!!!!
*خارج النص:*
التحية والتقدير لثُوَّار منطقة نيرتتي وهُم يقدمُون درساً راقياً واسلوباً حضارياً يعكس مطالبهم العادلة حيث قامُوا بتنفيذ اعتصام سلمي صار مضرب المثل في الإعداد والتنظيم والإخراج.. انتبهت لهم الحكومة مؤخراً (مشكُورة) فارسلت لهم وفداً عالي المستوى بقيادة الريِّس محمد الحسن التعايشي، وزيرة الرعاية الإجتماعية لينا الشيخ، وزير الإعلام فيصل محمد صالح بجانب الفريق عبد الرحيم دقلو قائد ثاني قوات الدعم السريع…
جاءت الأخبار بأن الريِّس ووزراهُو زارُو وخفُّوا ووعدُوا واتخارجُوا..
أما سعادة الفريق عبد الرحيم دقلو.. زار وطايَب وغَمَتْ.. مليار جنيه، ١٠٠ عربة لحفظ الأمن ووعد بخدمات أُخرى!!!
الفهم حاجة يقولها طوالي!!!!!!
.
.
.
.
*وما زال سؤالنا المتكرِّر البلد دي السايِقَها منوووو؟؟؟!!!!*
