بسم الله الرحمن الرحيم
في السلك
• يكون عندك طفل في زيرو
• زيرو حق المدرسه ده
• ما الزيرو حق الجماعه
• مابفرق زيرو كبير ولا زيرو صغير
• المهم كلو زيرو
• ومافيش زيرو احسن من زيرو
• الصفر ياهو الصفر
• وترجمنا الزيرو بالصفر
• عشان ناس استكشات يفهوا
• اها
• الطفل ده يقولوا طلع الاول في فصلوا
• الناس تجيك تبارك
• حلاوه وحاجه بارده سااااااااي يقطعوا جيبك
• ويقولوا ليك عقبال الدكتوراه
• معقوله
• من زيرو لي دكتوراه طوالي كده !
• زول باقي ليهو تمانيه سنين اساس
• وتلاته سنين ثانوي
• وخمسه سنين جامعه في المتوسط
• وسنه خدمه
• وسنتين ماجستير
• وسنه لف
• وتلاته سنين دكتوراه
• كلها زي ثلاثه وعشرين سنه
• يعني قريبه لعدد السنين القضاها معانا مانديلا
• الشافع ده لسه ياناس
• في زيرو يادوب
• زيرو بتاع الدوليه
• المدرسه الدوليه
• تقول لي دكتوراه !
• بمناسبة مانديلا
• بعد شهور عازمنكم
• الاحتفال باليوبيل الفضي لاول كأس جوي جبناهوا
• اول كأس جوي دخل البلد
• والناس لسه في السنين المره
• و العيون سهرن لسه ما هجد
• دخل البلد ودخلنا بيهو القصر الجمهوري
• وادونا السياده بقرار جمهوري
• السيد عيسي صباح الخير
• السيد حامد بريمه
• وبقية الساده
• ومدد يا اسيادي
• الاسياد الجد جد
• المافشخره وبوبار
• نحنا سيدنا المشير سوار الذهب
• والمشير عمر حسن احمد البشير
• انتوا السيدكم منو ؟
• جنس سلبطه
• اها
• لاقاني واحد من الجماعه يتبسم
• ويتكشم
• قال لي ماباركتوا لينا
• قلت ليهو نبارك ليكم شنو ؟ اللهم اجعلو خير
• قال لي الغلب الاخير ده ودور الاربعه
• قلت ليهو دي خطوبه ساي
• وبعد ده احتمال العرس يقوم
• ناس افريقيا ديل انتوا ما بتعرفوهم قدرنا
• الجماعه ديل نسابتنا من بدري
• بدري الكلام ده
• بنطوا في اي لحظه
• ونبقي في لاراش وما لاراش
• لكن نحنا طبعا بنعرفهم
• وناسبناهم
• واخدنا منهم تلاته بنات
• واحده في 86
• وواحده ( ودي اسمحهن ) في 89
• والتالته في 94
• ده غير كم عرسه عربيه مسيار كده
• وبعدين نحنا عرسنا عدييييييييييييييل
• لينا عشرين سنه
• انتوا ماباركتوا لينا
• نحنا نبارك ليكم خطوبه , ود عم المخطوبه عندو راي فيها !
• ود عمها وقال دايره
• شيلوا حلاوتكم وفتح خشمكم وارجعوا
• عرسنا لينا عشرين سنه
• وولدنا اسي في الجامعه وانتوا يادوب كايسين للخطوبه !
• غايتو لو العرسه دي تمت ( ودي مستبعده ) عشان الناس ما يضحكوا في العريس
• ويقولوا كبير وعجوز احسن ليكم تصبغوا
• بس ما تسممكم الصبغه
• وبعدين ما تنسوا
• قبل كده قاعدين في حفلتكم
• والغني قرش ونص
• فجأه العرس طرشق
• لاراش ود عم العروس نسيتوا !
• يوم زولكم ادي الشبال للعروس
• ياخ يوم ادي المأذون اسم العريس غلط
• وبقيتوا في الحفله معازيم ساي
• ده غير الحفله التانيه
• المره دي ابيتوا عرس النادي
• شومتوهوا
• سويتوا العرس في البيت
• هاك ياردم رمله
• وتصليح زلط
• وصيوان قدر الضربه
• وزينة الشوارع تقول بق
• والفنان يغني تشبهي مهر السبق
• وبق00 بق 00 بق 00 بق
• الحفله انتهت
• ود عم العروس ساقه وفات
• اباركم ليكم شنو ياخ ؟
• انتوا مضمونين ؟
• طوالي محرجننا مع اولاد عم العروس
• بالمناسبه
• خمسة مازيمبي كانت في دور الاربعه ولا قبلوا ؟
• كان كده ماشين صاح
• بغلة عبد الخير بدت تهدن
• ابشرن يا الخيل
• اها
• طبعا الموسيقي لغه عالميه
• يعني يعزف بوب مارلي في زيمبابوي يرقص جباره في الديم
• شايقي يعزف طمبور علي ايقاع الدليب في تنقسي
• ينقز خواجه في كندا
• لغه عالميه
• يدوبي حميدان في دار حمر يتحرقص هندي في كلكتا
• الموسيقي لغه عالميه قلت ليكم
• لكن المحيرني
• اثناء الكوره
• استكشات ده كان بتكلم مع كولي بالي كتير
• ومعروف كولي بالي ده بعرف فرنسي بس
• استراكشات ده كان بصفر ليهو ياربي !
• الصفاره برضو موسيقي
• والموسيقي لغه عالميه
• غدا احدثكم عن قصة الكوره الحكاها لي وليد البشري الهلالابي
سلك كهربا
ننساااااااااااك كيف والتيحه من كتلتك ليها ماقامت !
والي لقاء
سلك
babikir maki [b_silik@hotmail.com]
