أصل الحكاية
بصراحة شديدة وطالما عصام الحاج سكرتير نادي المريخ مافي حاجة إسمها سمن وعسل مع الإتحاد العام.. ده الظاهر .. زمان لما كان الإدارة فيها ندية أيام الإداري المحترم محمد الياس محجوب كان عامل حاجة إسمها مجموعة (البركة) ودخل في صراعات معروفة تحت هذا الإسم مع ودالياس .. لكن الزمن دار وإختلفت الإدارات وجاء زمن في المريخ بقي الإداري فيهو زول واحد (جمال الوالي) والباقين تمامة عدد وحتي المعارضة التجمع الأمدرماني متفقين عليهو والدليل ماحصل قدمو رئيس واحد ضده في كل إنتخابات نادي المريخ .
المهم عصام الحاج وبعد ماقرر يعتزل العمل الإداري وإبتعد سنوات قرر فجأة وبدون مقدمات يرجع تاني .. اعتذر للقاريء لأنه عاد بمقدمات .. تتذكروا حكاية شباب من أجل المريخ .. وعلقت وقتها علي المجموعة وسميتها (شباب من أجل الوالي)؟ وإستغربت وسألت يعني شنو شباب من أجل المريخ ؟ وليه ماشباب من أجل التغيير؟ وقلت كنت حااحترم المجموعة لو بدأت بهدف واحد ومحدد (تغيير جمال الوالي) وزي ماإتوقعت إنكشفت القصة وإتعرف منو مع منو؟ إلي نهاية المسرحية الجابت الوالي للمرة الكم ماعارف رئيس للمجلس .. عصام الحاج كان مع الناس ديل او هم معاهو وإحتمال مع طارق سيد المعتصم .. المهم الرجل كان متقدم صفوف اللقاءات ويدعو لترشيح جمال الوالي رئيس طوالي .. ودي من الحاجات الغريبة وماغريبة .. يعني ممكن تكون غريبة لي زول عادي يصدق إنه في صراع والدنيا قايمة وقاعدة عشان فلان ينزل وعلان ماينزل ويصدق إنه في منافسة إنتخابية .
والماغريبة إنه أي زول كاشف الوضع في المريخ عارف مافي مجلس بدون موافقة جمال الوالي .. وفي دي عصام الحاج لعبها صاح قدم نفسه من البداية مؤيد للرئيس .. مصيبة عصام إنه دخل المجلس بعد ماأقنعوا طارق المعتصم بالتنازل يعني دخول بواسطة ..
زمان زمن ودالياس كانت الكتوف تقريبا متلاحقة بقول رايه تتقف ولا تختلف معاهو وكانت الشخصية قوية وإرتبطت بالصراعات والمعارك داخل البيت المريخي وخارجه .. حاليا الراي راي جمال .
تلقائيا عصام الحاج ماعندو وجود في زمن الوالي إلا في المساحة العايزو يتحرك فيها .. طيب يعمل شنو عشان يقول أنا موجود .. فتش شمال يمين مالقي حاجة الصراع مع الهلال موجود من قبل مايجي يعني مافي جديد نحت راسو ورجع للدفاتر القديمة لقي عندو صراعات مع الإتحاد العام .. قال دي الحتة الوحيدة الممكن أقول فيها أنا موجود ..
وصل في النهاية مع آخرين إنه لابد من إتفاق الهلال والمريخ ضد الإتحاد ومافارقة كتلة الممتاز لأنهم حسب مفهومو ماعندهم قيمة بدون الهلال والمريخ وتم الإتفاق وأعلنوهو في وسائل الإعلام ..
لكن عصام نسي حاجة مهمة في حكاية إدارات زمان وإنها مابتشبه إدارات الزمن ده إنه التغيير وصل حتي الإتحاد العام يعني إتحاد زمان مازي إتحاد الزمن ده وحاأقول سيناريو واثق من صحته مليون في المية أنا متأكد إنه جمال الوالي وقيادة الإتحاد وعلي رأسها معتصم جعفر بضحكو علي الإجتماعات والقومه والقعده والبيانات والتوقيعات ..
وممكن عصام الحاج يكون ماعارف او فهمو غلط لكن المافاهم فعلا مجلس الهلال .. بإختصار مجلس المريخ عمرو ماحاياخد موقف من الإتحاد العام طالما جمال الوالي رئيس للنادي والإتحاد العام ماحايكون عندو مشكلة مع الوالي طالما قيادته الحالية موجوده .. يعني البحصل ده ياعصام الحاج بشبه الكلام القالوا الرئيس السابق حسني مبارك (خليهم يتسلوا) وإنت بتتسلي بمزاج جمال لكن مابتقدر تعمل حاجة لو هو ماموافق وكل الشواهد بتقول ماعندو مشكلة مع الإتحاد .. والحقوق والتلفزة هو عارف انها ماحا تجيب نتيجة .. يعني ياعصام انت برضو بتلعب في منطقة جمال عندو فيها كلمة مسموعة .. شفت الزمن إتغير كيف .
hassan faroog [hassanfaroog@hotmail.com]
