20 أكتوبر 2020م
مما يُذكر ويُقال: النظام السابق تسبَّب في وضع إسم السودان تحت قائمة (أمريكا الإرهابية)..
الشعب السوداني العظيم بعد 30 سنة من (دحفسة) الإنقاذ وحصار الأمريكان.. ثار وأسقطه وأدخل معظم قادته سجن كُوبر..
تقُوم حكومتنا الفاشلة (اللِّي شعبها واقف بالأيام والليالي في صفوف الخبز والوقود)، تمشي تفاوض الأمريكان بدفع تعويضات عن جرائم (تقُول أمريكا) أن النظام السابق اللي سقَّطُوا الشعب ووضع قادته بالسجن هُو المتسبِّب فيها!!!
يعني ما عملناها نحن؟؟؟
نعم.. إنتُو شعب طيب ومُسالم ويشهد لكم العالم بذلك..
طيب يا حمدُوك ويا برهان ويا حميدتي.. مادام الشعب دا ما فعلها.. وهُو السقَّط ليكم الناس العملوها..
ليه تدفِّعُوهُو ثمنها؟؟؟
كلام العقُل يقُول.. يدفعُوها الإتسبَّبُو فيها.. ويحمدُو سيدُن خيرُن مدفِّق.. مبسوطييييييييين بي أراضيهم.. مزارعهم.. شركاتهم.. عماراتهم.. وعرباتهم أم جضُوم!!!
لكن للأسف.. هُم (وأنتم) مستمتعين بي عرباتنا الفارهَة.. وقصورنا الفاخرة.. وأموالنا المنهوبة..
ونحن ندفع فواتير كوارثكم!!!
وفُوق دا كلُّو إن شاء الله يجيب مريسة تام زين!!!
فإسم السودان الموضوع زوراً وبهتاناً ضمن هذه القائمة الكريهة قد أضرَّ كثيراً وأقعد البلد وأعاق نهضتها وتقدُّمها.. نسال الله أن يصدق هذا (المُصارِع – التاجر) لمرة واحدة ويفعلها وتُفرج على هذا الشعب الطيب الغلبان…
بس المخاوِف الحقيقية، الله يستُر ما يكون الشرط القادِم هُو مسألة التطبيع مع الكيان الصهيوني الغاصب!!!
.
.
.
يا خُرطُوم وينِك وينِك..
يا خُرطوم شِنْ شَبَّ وقَلَبِكْ..
ياخرطوم شِنْ سَلَبِكْ حَلَبِك..
زُنْجِكْ، نُوبْتِكْ، بِجَتِكْ، وعَرَبِك…
يا خرطوم أزَّمْنِي الصَلَبِك فُوق الطَلحَة الأمريكية!!!!
رضي الله عن محمد الحسن سالم (حِمِّيد) ورفع الله درجاته في عليين…
jamal.trane@gmail.com
////////////////////
