بسم الله الرحمن الرحيم في السلك *جميل جدا ان يتعايش الوسط الرياضي في روح رياضيه *والاجمل ان تكن المداعبات حاضره *فهي فاكهة الوسط الرياضي *والمتتبع لتاريخ الجماهير *يجد ان الامر كان كذلك * ماكان لاحد ان يتجرأ ليشجع خصما اجنبيا في مواجهة فريق سوداني *يمكن الدواخل كانت تخفي امنيات الهزيمه لفريق البلد في نفوس البعض *ولكن ادب الرياضيين كان يمنعهم من البوح جهرا بذلك *وتظل جريمة تشجيع الاجنبي حبيسة النفس *ولا غبار علي ذلك *فالقانون لا يهتم بالنوايا الا اذا اخذت مظهر خارجي *وطالما جريمة تمني الهزيمة لممثل البلد كانت في سجن النوايا *لاضير *المهم *كان الامر كذلك *واستمر كذلك *حتي جاء ختام سيكافا بالخرطوم85 *وقتها كان الهلال يلعب غلي المركز التالت *والمريخ يلعب علي البطوله *نسوي شنو يا اخواني *كلو زول بي مكانتو ومستواهو *المهم *مباراة الهلال من عصرا بدري *التالت والرابع *كانت ضد فيلا *فيلا تقدم بهدف *جماهير المريخ شجعت الهلال حتي عدل النتيجه وتعادل *ثم فاز بالترجيحيه *وقفت جماهير المريخ وقفة رجل واحد مع الهلال *لانها صفوه *ويمكن لان الهلال مهما انتصر *سيظل في صفره *التاني والتالت ما بجيبن كاس *المهم *لذا عند ظفر الهلال بالمركز الثالث (وهو افضل مركز للهلال من عشرة مشاركات في سيكافا ) *قام لاعبو الهلال بتحية جماهير المريخ *ذهبوا للمساطب الجنوبيه وصفقوا لجماهير المريخ *اسألوا طارق احمد آدم ورفاقه *وبعدها استعد الناس لمباراة البطوله *المريخ ضد البيره الكيني *وما ان نزل فريق البيره للملعب *حتي سمعنا صوت جماهير الهلال لاول مره *ولاول مرة في تاريخ الحركه الرياضيه *يشجع جمهور سوداني خصما اجنبيا بالواضح كده ؟؟؟ *ماهي علاقة الهلال بالبيره حتي يشجعوهوا بهذه الهستيريا ؟؟؟ *وهل البيره الكيني اقرب للاهله من المريخ السوداني ؟؟؟؟ *وبماذا ستفيد البيره الاهله ؟؟؟ *كانت صدمه للجمهور المريخي *كانت سقطة من سقطات التاريخ *كانت وصمة قبيحه في وجه الرياضه الجميل *وبعد المباراه *بعد ان فاز فريق البيره بهدفين لهدف *اذا بجماهير الهلال تسير المسيرات بالشوارع *ومن يومها سقطت كل المعاني النبيله *يغني جمهور الهلال للبيره *ويهتف جمهور المريخ بعباره لم انساها لليوم *حيث هتفوا *حد يغالط الهلال التالت !!!!! *وده كان اول مسمار في نعش الروح الرياضيه *ثم بعدها جاء الينا الاهله بالتابوت *ايها الاهله *البيره شالت كاسها ومشت *البيره ما بتنفعكم اسمعوا كلامي *البيره تعملوا بيها شنو وكاسها مسجل باسمها *ومن يومها يغنوا للبيره والصفر في حيره *المهم *كردنه يشيل ويأجل في معسكر الهلال *من اطناشر لي اربعطاشر *من اربعطاشر لي سبعطاشر *من سبعطاشر لي تسعطاشر *من تسعطاشر لي عشرين *اقول ليكم *من واحد وعشرين لي راس السنه ما بعيده *روسوا وسافروا *يحلها الف حلال *المهم *صديقي عماد الطيب زعلان من جمال *قال كييييييييف جمال يسجل بكري وبكري قابض قروش من الهلال *يا عمده الا صحيح النت في السودان بجنيه ؟؟؟ *انت ياعماد لما الهلال سجل علاء الدين موش كنت امين عام وقتها ؟؟؟ *علاء ده موش قابض من المريخ قروش ؟؟؟ *ولا قابض الريح ؟؟؟؟ *حرقتكم اسي ؟؟؟ *ماقلتوا *ماقلتوا مقددنها *غايتو حكايتكم حكاية *لكني اتمني ان ازور اخي روشا علي فنجال قهوة في نادي الهلال *اي زمان يا روشا *ان شاء الله تلاته صباحا *بس تكون الجبنه في نادي الهلال *وكل امنياتي ان اري فطومه اختي وهي تنطق نيابة عن الهلال من داخل نادي الهلال *اشوفكم في نادي الهلال واكون فرحان يوم تكون جمبي *المهم *اليومين دي ناس المرور ما مرخص بدخلوك الحوش *عربيتك عينك ليها *تخليها وتمشي *وبص الهلال دخل النادي *دخل الحوش *وسيدو يعاين وماقادر يمرقو *جبنتنا في الحوش يا روشا ما تنسي *الحوش الدخلو البص وماقال كش *حد يشجع البيره يا نااااااس !!!!!! *يلعن ابو الشعير زاتو *بيره !!!! *ما اتبربري *منو دي ! انا دي ! *بري بري بري *ايها الناس *ان تنصروا الله ينصركم *اها نجي لي شمارات والي الخرتوم *كان شفت يا والينا *لمعرض الزهور مشينا *قلنا نمتع عينينا *نشوف زهور بدل الذهول المسيطر علينا *نشوف الورد لو الورد يقدر يشفينا *نشم الياسمين بدل شمة القاسيين علينا *اتخمخمنا ومشينا *لقينا الدخول بتذكرة يا والينا *يعني في البلد دي الداخل القبر يدفع يا والينا ؟؟؟ سلك كهربا ننساك كيف ولو داخل في اضافرينك يدفعوك تذكرة والي لقاء سلك b_silik@hotmail.com //////
