الليله الرفع

بسم الله الرحمن الرحيم

 

في السلك

 

 

 

•          احبتي القراء ايا كان الانتماء

•          اسمحوا لي باسطر جاده

•          داير اقول كلام مهم

•          ملح التنافس الرياضي هو المداعبات والسخريه البريئه

•          في اطار قلوب لاتحمل ضغائن والسن تعف عن السباب والشتائم

•          الناس بتقول خلي اخلاقك رياضيه

•          يعني تقبل الهزيمه بصدر رحب

•          ولا تبطر بنصر

•          انا شخصيا اداعب الوان الطيف الرياضي في براءه تماثل الاطفال عند لهوهم

•          لا احمل علي انسان في الوسط الرياضي اي محمل طالما كنا اخوه في الرياضه

•          حلوه اخوه في الرياضه

•          بتشبه اخوه في الرضاعه

•          ولكنها لا تمنع التصاهر والانصهار

•          تعالوا جميعا نداعب بعضنا في ادب واحترام دون اساءات توجع الضمير

•          كلنا كتاب واداريين وجماهير

•          تعالوا نتحلي بسعة صدور تسع  مليار مشجع ومليون ميل مربع

•          تعالوا نداعب بعضنا دون ان نجرح بعضنا

•          نتبارز بسيوف من حرير

•          حتي لانقتل بعضنا غيظا وتجني

•          بادر الاخوه الاهله بالتابوت والجنازه

•          وتبعهم اعلامهم باطلاق لفظ المقبره

•          لذا كانت جثامين الرابع من اكتوبر تملأ شوارع الخرطوم

•          يعني لو كنت نايم وصحيت وشفت السكلي والجنائز قطع شك تقول ده تضامن مع ناس غزه

•          ناس خاته الجنازه في وسط الزلط وتسكل

•          وناس شايلين الجنازه في سرير دبل

•          تقول المات مأذون

•          وناس تابعين الجنازه بالعربات الفارهه اقساطها لسه ما تمت

•          وناس تجري علي الجنازه

•          وناس تجري من الجنازه

•          كلها مداعبات لكنها زادت حبتين

•          انا ما داير اقول البادئ اظلم

•          وما داير اقول اوقفوا المداعبات

•          لكن داير اقول البفوت حدو بنقلب لي ضدو

•          وتكبر الضغائن في النفوس

•          وتدخل الوسط الرياضي تصرفات ماكان لها ان تدخل لو لا تمادي اهل الوسط الرياضي في الافراط  في التعصب والتفريط في الخلق الرياضي الامثل

•          ولا شنو ياجماعه ؟

•          نرجع نداعب الاحباب شويه

•          قالوا الليله الرفع

•          لكن اهل الفراش زعلانين من الناس الماجو ومن الناس الجو عزو وبكوا لكن ما وصفوا

•          المفروض في  الداير يبكي  يخت يد وراهو والتانيه قدامو ويوصف المرحوم وهو ماشي لي آخر الحوش ويرجع تاني بنفس الحركه مع ثنائيه في الاتجاه المعاكس من بكاي تاني

•          يوصف ويقول الليله يا ود امي 000

•          الليله يا الراجينك تجينا شايل الكاس وجيتنا ملفلف من الانعاش 00

•          اهي 00 اهي اهي 00  ياود امي

•          يلفح منو التاني

•          الليله وووووب

•          اريتني انا 0000 راجينك باص وخانه مرقت بهناك للحتانه

•          اهي 0000 اهي 0000 اهي 000

•          ويفتش للمنديل ما يلقاهو وطوالي خووووووو 000 فييييييط ويقش في طرفو

•          قرف يقرفك

•          يقولها زول قاعد في الفراش وما ببكي

•          واحد تاني يلاحظ للزول القال قرف

•          يجيهو براااحه يقول ليهو انت ما بتبكي مالك ؟ المرحوم ما واجعك ؟

•          يرد عليهو ويقول بعزي ساااي ما ببكي

•          يقول ليهو شوف يا يتبكي بي وصف يا تخت في الكشف

•          الكشف العاملينوا قبال البكا ده

•          المهم بالفي بالمافي الليله الرفع

•          فرتيق للصيوان والمالحق يلحقنا بالكشف

•          شيك مؤجل بنقبل

•          اقساط زي حافز الكاردينال بنقبل

•          شرينق بنقبل

•          خمسه فنانات وخمسه اهداف فنانات

•          الخوف كورة الرد تكون بي كورال الاحفاد

•          ياربي كورال الاحفاد عددهن كم ؟

•          قالوا الاهله ما مرقوا من الاستاد لي آخر المباراه

•          الجمهور مخدر يا روشا ولو البنج فكه بتعرفوا حاجه

•          قرر الاتحاد الافريقي اختياراستاد  الهلال لمباريات الخماسيات

•          بختكم

•          بالمناسبه

•          ناس الجزائر دفنوكم باتنين لليوم ما مشيتوا كورة الرد وقفلتوا الاستاد 340 يوم

•          يعني الخمسه دي تقفلوا الاستاد 850 يوم ولا شنو ؟

•          ده حالتو  مابي موبوتو

•          امال لو كان ما مابي موبوتو كان كم ؟

•          درمه قالوا لي اسي مادفن الهدف الخامس

•          راجي شهادة الوفاه

•          في حبيب البلد فييرا ( نمره خمسه ) قال لعبنا وراسنا لافي بس ده  برضو عذر ماكافي

•          خلاص ياناس لافي اقلبوهو ثقافي

•          سا000 سا 000

•          سا  شنو ؟

•          سا000 سا000

•          خمسه

•          ناس مازيمبي نزلوا الملعب قبل ساعه

•          لابسين شباشب وبرمودات ( يا حليل كروجر )

•          حاموا في الميدان ورقصوا ودخلوا غرفة اللبس

•          جوا تاني داخلين لابسين لبس خمسه

•          الحمد لله المالبسوا لبس تسعه

•          تسعه ليه 00 مازيمبي ولا الهونفيد اصلوا !

•          ابو تميمه كان جاري ساااي

•          قلنا ليكم من علق تميمه لا اتم الله له

•          اها اتخارجتوا بي تميمتكم

•          الناس اختلفت في اسباب الخمسه

•          ناس قالوا ده شحن يوسف السماني الزائد

•          وناس قالوا ده شتل ناس روشا

•          وناس قالوا كلام كتييييير

•          لكن انا شايف السبب ابراهومه

•          من قام وقال لي سفاري امرق اتخارج عرفتها

•          ده السبب الجاب مازيمبي ضد تاني المجموعه

•          الله يجازيك يا ابراهومه

•          لاعب تجنن مدرب تجنن برضو

•          سا 00 سا 000 سا

•          خمسه

 

سلك كهربا

                  الناس الفرحانه 000 وينكم

                              والي لقاء

                                 سلك