تجمع المهنيين وقوى التغيير تسيدا الساحة السياسيه بكل اريحيه بل ومن خلال الصبه اكتسبا ثقة وشعبيه وشرعيه مستمده من الشارع فى استفتاء بيان بالعمل شهدته مسارح الصبه التى امتدت لكل اطراف الخرطوم الى ان عادت مرة اخرى لمركزها الرئيسى امام القياده العامه.. مما اذهل العالم اجمع بالاسلوب الحضارى والسلمى المتبع الذى اجبرالرئيس الفرنسى التحدث عنها طالبا من شعبه ان يحذوا حذو الشعب السودانى …واجلست حكومة الصبه سفراء امريكا واوربا فى حضرتها ونفذ السفير الامريكى تعليمات امن الصبه المهذبه بخضوعه للتفتيش الشخصى ومن شدة اعجابه اهداهم جهاز تفتيش الى حديثوهو ممثل الدوله العظمى التى اذا عطس رئيسها اهتزت جنبات العالم رعبا
تجمع المهنيين وقوى التغيير منحهم شعب المنصه تفويضا مفتوحا لم يستثمر بالقدر المطلوب…. تفويضا سعت له الاحزاب السياسيه السودانيه بكل اطيافها من اقصى يسارها الى اقصى يمينها ولم تجد منه ما يشفى غليلها لانها ببساطه كانت فى وادى غير ذى زرع ولا يلبى ادنى طموحات شعبنا
ماهى متطلبات ورغبات شعب المنصه بعد ان ازاح كابوس الثلاثين عاما؟؟ انها متطلبات واستحقاقات تتمثل فى فترة انتقاليه اقصاه ثلاث اعوام لانجاز مهام محدده تهيىء البيئة السليمه لتداول سلس وسلمى مستدام للسلطه وذلك
بالاسراع بببناء هياكل الحكم الثلاث للفترة الانتقاليه وهى مجلس السياده وحكومه تنفيذيه والسلطه التشريعيه لانجاز
اعادة ترميم وبناء للدمار الشامل الذى اصابت به العصبه المتاسلمه السودان طيلة عقودها الثلاث
صياغة ما عجزت عنه الاحزاب السياسيه منذ الاستقلال وحتى الان المتمثله فى دستور دائم يتحاكم به الجميع
بناء وتاسيس دولة المؤسسات السياديه التنفيذيه التشريعيه والعدليه مع اعلام حر ومسؤول
قانون جنائى ومدنى يؤسس لمجتمع تتساوى فيه الحقوق والواجبات محروس بدستور ينفذ بقضاء مستقل
الاهتمام بالتعليم والصحة وامن المجتمع
قانون ينظم ويقنن العمل الحزبى ومنظمات المجتمع المدنى والاعلام وكل وسائل وادوات المجتمع التى تعينه للبناء والتطور
السؤال لماذا عجز تجمع المهنيين وقوى التغيير فى انجاز تشكيل اليات الحكم اعلاه وهى تمتلك تماما ومن غير منازع شرعية الشارع السودانى من خلال اعتصامه الذى طال امده؟؟ خاصة وقد تم الاعلان بالاتفاق مع المجلس العسكرى حتى على النسب فى درجات الحكم الثلاث عدا اختلاف فى مجلس السياده والخطأ الذى وقع فيه الملكيه انهم اعطوا العسكر مساحة اكثر مما كان يتوقعها اكثر العسكر تفائلا!!؟؟
العسكر اعلنوها فى البدء.. نحنا سادين فرقه لغاية ما تشكلوا حكومتكم… وتباطئتم واحلوت المساله ودخلها كهنة السياسه وثعالب الجوار
التجمع وقوى التغيير لا يحتاجان لاذن من المجلس العسكرى اساسا لانكم تملكان شرعية الشارع وهو الامر الناهى للكل… وليكن واضحا ان المجلس العسكرى قام اساسا لسد فجوة الانفلات الامنى وهذه من اولى مهام القوات المسلحه والاجهزه الامنيه الاخرى الدستوريه المتعارف عليها …. بينما اصاب {الكساح بل الشلل التام} الذراع المدنى فى انجاز مهامه حتى يعود العسكر لثكناتهم مشكورين
لا تعلقوا فشلكم على المجلس العسكرى واتهامه بالمماطله فقط اعلنوا ومن خلال المنصه عن تشكيل مجلس السياده والحكومه والمجلس التشريعى…. ودعوا باقى الامور لشعب المنصه شابكننا المجلس العسكرى المجلس العسكرى هو اصلا المجلس العسكرى ده عينكم؟؟ انتو اكتسبتو شرعيتكم من الصبه وممكن الصبه تسحبها منكم لو طال تلكؤكم الحكايه ما لعب الحكايه…مصالح امه معطله…. وارواح شهداء..ودماء وجرحى سالت… ومصالح عديده تعطلت
شابكننا المجلس العسكرى ما عايز يسلم السلطه للمدنين… اعلنوا حكومتكم وساعتها على المجلس العسكرى اداء التحيه وخلف دور معززين مكرمين …. ولا عايزين المجلس العسكرى يشكل ليكم الحكومه ومجلس السياده والمجلس التشريعى ويلفها ليكم فى ورقه عشان يسلمكم السلطه…. حلوه يسلمنا السلطه دى
اعزائى دى ما بسلموها دى ممهوره بارواح الشهداء ودماء الجرحه… بس انتو اعلنوا تشكيلاتكم واذيعوها من المنصه وخليهم يشوفوا شغلم… لكن ما دام رضيتوا تخشوا سفارات السعوديه والمحور اياه اخير تخلوها للعساكر ديل؟؟؟… السبب البخليكم تخشوا السفارات شنو؟؟ والفوضكم منو ؟؟ دى شغل مجلس السياده والحكومه والمجلس التشريعى القادمين ولا اقوليكم خلو الصبه وامشوا رطبوا مع برهان وحميدتى فى القصر ولو لاقيتو بشه سلمو لينا عليه!! صح النوم ياااااا مهنيين وقوى تغيير اهو الاضراب ونفذوا ليكم اى حاجه طلبتوها اتعملت.. شيلوا المتاريس شالوا المتاريس… لا وكمان عملوا ليكم اروع لوحه تشكيليه فى تاريخ الكره الارضيه رسومات على طول الشوارع يعنى مش شيل متاريس ونضافه بس كمان غسيل ومكوه ورسومات ما احلاها
طيب اعلنوا اسماء مجلس السياده والحكومه والبرلمان وخليهم يشوفوا شغلهم واول تعليماتهم حتكون…برهااااان صفا… اااانتباه… خلف دور.. ثكناتكم معتدل مارش
للمره الاخيره يا مهنيين ويا قوى التغيير خلوا المحركه والحكايه طولت والبزيد عن حده بتقلب لى ضده وكترت الملح بعمل ضغظ خلونا {نعيد} بمزااااااااااااااااااااج مع حكومتنا الجديده الطال فراقه وطال…. تلاتين سنه…. يمكن تدى الناس عيديه…. ريحوا حميدتى شويه قديتوا جيبوا…. وكل عام وسودانا بخير وكلكم بعافيه
waladasia@hotmail.com
/////////////////
