اها بتجو تدقو للناس بيوتم تقولو ليهم امشوا الشغل: اخير ليكم ستفو شنطكم

قبل ان يجف مداد ما اطلق عليها ام سفنجه خضراء والتى من بلاوى السودان ان يتقلد مثلها منصب وزير دوله ولكنها مهازل اخر الزمان حيث قالت (شل لسانها) الدوله لا تستطيع علاج المواطنين ورفع الدعم ما بتلغى
وبعد صلاة الجمعه جاء وزيرها فى مؤتمر صحفى مفاجىء يعلن تحميل كل المسؤليه للأمين العام لمجلس الأدوية والسموم محمد حسن إمام العكد واقالته من منصبه لانه غش الحكومه وضللها ياخى مش عيب عليك وعلى رئيسك؟؟ دوله بحاله يغشها الكحيان دا يا راااااااجل؟؟!!! ياخى دى طفل يادوب طالع من بطن امه ولسه ما نضفوه كويس لو سمع كلامك دا يشيب ويطالب الدايه ارجاعه لملازه الآمن.. يعنى الجربوع دا غشه الحكومه كلها بجيشها وامنها وشرطتها ووزارة ماليتها ورئاسة جمهوريتها ومجلسها الوطنى وام سفنجه خضرا وكلهم وقفو سلك انو لا تراجع عن هذه القرارات وقومت نفس العالم كلو!! بالله دا كلو يجى من تحت راسك يا ود العكد؟؟! والله اتلومت بالحيل دا انا اخاف من البشير يطلعلى العكد اها كده زعلت بشه لانك نافستو فى ما يبدع فيه من فنون الكذب والغش وطبعا من زعلتو كضب علينا قال ليك امشى شوف ليك شغله تانى لكن بينى وبينك بشه راجل طيب بكون بجهز ليك حته اريح دا طبعا لو عمك قعد{ ولو} حرف شعلقه فى الجو والجو اليومين ديل جو عصيان مدنى واضراب سياسى يعنى ملبد بالغيوم والامطار والاعاصير والهبايب
طيب اقتنعنا انو غشا الحكومه المسكينه اها بعد كلامك دا يا الوزير انا امشى اشترى الدواء بالقديم ولا الجديد دى ما حددتها لانك لم تلغى قرارات المسكين {خروف الضحيه} بتاعكم والناس لغاية ما تجتمع اللجنه الجديده والامين الجديد يعملوا شنو يبطلوا يمرضو ولا يبلوا رشتاتهم ولا يلبسوها حجاب
بعد 28 سنه ؟؟ دى عمايل تعملوها؟؟ لمعلوميتك عرفت انو الخجل قدم طلب عاجل لمجمع اللغه بشطبه نهائيا من التداول لانه صار فاقد الصلاحيه والتداول فى السودان وطلب حق الحمايه وحفظ حقوقه الادبيه عندما كانت تحمر وجنات الحسان خجلا والان صارت تسود من الكذب الذى بدا يتضرر من كثرة الاستهلاك لمدة 28 عاما وهو اى {الكذب} يجهز حاله لاعلان افلاسه حتى يحظر من التداول
انتو كضبتو كضبكم وسرقتو وقتلتوا ونهبتوا وعملتوا ما جعل الشيطان يطلب حق اللجوء والاستغفار 28 سنه
اها دلوقت جا القول الجد الما بتعرفو الشعب قال كلامه واعلنا بانو يبدا من يوم الاحد كل واحد قاعد فى بيته فى حيه واى واحد من العاملين فى الاجهزه الامنيه ساكن فى الحله وما يقيف مع اهله فى الحى ستتم مقاطعته وحتى اهل بيتو ذاتو حيكون ما عافين منو اها دا السلاح الما بتقاوم ولا نتعبكم ولا تشاغلونا العصيان المدنى والاضراب السياسى المعلن فى كل احياء السودان يوم الاحد 27 نوفمبر اها بتجو تدقو للناس بيوتم تقولو ليهم امشوا الشغل ياخى ما عايز اشتغل مع حكومه بغشها ود العكد الشعب جهز حاله واعلن العصيان المدنى والاضراب السياسى بطريقه جديده القعاد فى الاحياء وللاحياء حرماتها
اها النقولكم اخير تحترموا نفسكم وتستفوا شنطكم بالتى هى احسن وتتخارجوا
وانتى يا ام سفنجات خضر شوفى ليك ولى يلمك قالت شنو الدوله ما بتعالج المواطنين والقرار ما بتلغى اها شنو قولك بعد كلام وزيرك ورئيسك خمى وصرى واتعلمى الادب مع شعب السودان العظيم ونشوف بعد الانتفاضه حا تتعالجى كيف

waladasia@hotmail.com

\\\\\\\\\\\\\\\\\\\\\