اوضح من الواضح .. بقلم: راشد عبدالقادر

هل سقوط المواقع والانسحابات البتحصل والجرجرة والمياته بتاعت الجيش دى حاجه جديده؟ وهل سببا البرهان ولا دا شى اساسي ملازم الجيش؟ ولا ياها طبيعته بس الناس بتحب تغش نفسها وتخلق تصورات بطولية ووهمية للكيان الاسمه الجيش؟
حلايب من سقطت ليها كم سنه شفتو جيش استرداها؟
الفشقة وقت سقطت تانى الجيش ما استرداها الا بعد انسحاب الاثيوبيين براااهم وانشغالم فى معارك التقراى قبل سنتين..
طيب سيبك من دا فى شرق السودان وقت سقطت قرورة وعيتربا وعقيق وعقيتاى ومرافيت وقربت تسقط طوكر السقوط دا تم خلال ايام بسيييطه جدا الجيش من قرورة ما وقف تانى الا فى طوكر.. والجيش احتاج سنوات عشان بس من مرافيت يصل عقيق وكلها ما تامه ٢٠ كيلو
همشكوريب الجيش استرداها بعد كم من الزمن وكيف؟
طيب .. اكتر مرحلة شهدت تسليط اعلامى وتشجيع واظهار لبطولات الجيش كانت ايام حرب الجنوب وكتايب ومتحركات وجوووطه شى الاهوال والقعقاع وحق اليقين وخيبر ما خلو اسم معركة ولا صحابى الا عملوا متحرك او كتيبة.. الجيش كان بيزحف (بالسنين) عشان يكسب ليه كم ميل او يدخل مدينه..
فى ايام بس. اكرر ايام معدودة الربحو الجيش فى سنين فقده فى ايام من نمولى حتى قربوا يوصلوا جوبا لولا تدمير كبرى كيت يعنى جريه واااحده من نمولى ما وقفوا الا فى جوبا..
وياهو العملو خليل ابراهيم من اخر الدنيا لقوه حااايم بي جيشه جوووه الخرطوم..
ياهو دا الجيش ما شى جديد.. بيتحرك ببطء جدا وبينهار بي سرعة شديدة..
حتى فى وحدات فى الجيش مشهورة بمقولة (خزنه ثبات و خزنه شتات) يعنى بيقيف يضرب اول خزنه من سلاحه والتانيه بيضربا بي ورا ضهرو وهو جاري عكس.
الحروب زمان كانت فى الاطراف ومافى اعلام ومافى فيس وموبايلات تصور عشان كدا الناس قايلا الجيش خطيييير ورهييييب
فدا ياهو الجيش فى زمن البرهان وزمن ابنعوف وزمن اللمبي وزمن بشه وطوال تاريخو ما فى شى جديد اى فى ضباط خطيرين وشجعان وبيجازفو لكن ياها دى طبيعة المؤسسة دى ما حاجه اتعلموها جديد..
علا المعركة الان فى الخرطوم والمدن وقدام الناس والناس بقت شاااايفه الكانت ما بتشوفو.
فمشكلتك ما فى البرهان لو بتظن كدا تبقى زول ساااى زلنطحى ماااكن
مشكلتك فى المؤسسة دى كللللها ومهنيتا وقدرتا العسكرية
سيبك من قصص الانقلابات والتآمر
الجيش ما بيعرف يشتغل شغل الجيش.
#حرب_عبثية