بت الحلة المانعة الجات الطيش

 

 

عبدالماجد موسى
16 March, 2022

 

دائماً أغرق
في الصور التتشابى وتسرح فيني تخج الراحة
واغرق أكتر
لما اشوف الأمل الما بتحقق بين بلدي وعامل كتاحة
وشرايط الذكرى الماشه رواية وصوتها الأزرق شاقِّي الساحة
وباقي اللبن الشفتو مدفق
وأشجار النيم الكانت واحة
وبُشرى الآبريه نشمها بدري
بإنو الشهر الجايي مبارك
وملاح البامية اللاصق في الحيطة
ونظرة أعمامنا الما بتريح
ومامرتاحة
وريحة الطع ١٠٠ الضاجة في نص البيت
وعجاجها الدغري
وتكل التاية الكان مستغرب
والحِت حيت
والحبوبة الكان بتدندن في المِش شيط
وأبوي الراقد ونايم يحسب في الزمن القاسي عليهو يمسدو كيف ؟
والجيران الكانو بيحلبو في النعجة الودرانه
لما تمر في الشارع وتسرح جارية
وترقد قيف
وعم صديق اللا معقول
الكاتم نَفَسو
وكل أنفاس اولادو ومرتو الحنَّانه
وخاتي عليهم كل شروط الدولة الظالمة بحد السيف
وأبداً ما فارقه معاو
لو مفتاح السجن الشايلو في جيبو
اتكسرت فيو أسنان الخوف
او سرقو حرامي
وماتوا هناك أولاد الريف
والمستقبل كلو اتجفف
بحماقة جهلو
وفط خريف
وبت الحلة الشرانية
الملصت توبا
ودقت آمنه ووليداتا
دق العيش
وما هماها
تقرف يومنا وكل حياتنا
لأنو الولد الاخدر داك
واخوهو المُدَّسِي
جنب باب الزاوية هناك
رددوا ليها الطيش الطيش
نسوي شنو ؟
في شقاوة القمري القال مستني غناوي الصيف !
قول يا لطيف
وَنَمُرْ بسيد السمك الدايماً ناهر
وماسك سوطو
يهش
ويعافر
والشاطرة المابتتكلم ابداً
ميمونة
وكلب الحلة في شارع أستاذ بكري
صاحب الناير ابو ليمونة
وعبدالقادر
ود الحاجة العاشق نورا
والبت السمحة اللعبت كوره
وخلتنا نحب الرسمة
الما عصرية
وكانت كل أماني الشمس الغايبة
تمسي علينا
تلاقي عشيقها في كف حورية
والعَجَلة الرالي
الكانت تحفة
وسيدها الغالي
وكنا نمني النفس تشوف انوارا
بعد المغرب
وشارع التومة
الكلو تسالي
وبواقي القصب السكر
وحكاوي تلالي
مرت لحظاتنا الحلوة
بسرعة تهضرب
ومننا طارت
بجراحاتها وبنسيماتها
وكل تقاطيع الفرح السامي
عزف اوتارها
وكنا نحب اوقاتها بكل الألق الفيها
اتشاكلنا
واتصارعنا
واتخاصمنا
وبرضو رجعنا لِعبنا فِرحنا
ألقاب وأسامي مخدره فينا
حليل أيامنا الكنا براءة
لطيور القمرا نشد ونحامي
حليلنا الكنا نحامي
ونحكي البينا بكل جراءة
ما أجمل أيامنا الحلوة
زمانِك
للكل تحية
وللصحب العطروا صَحْو حياتنا
سلامي

عبدالماجد موسى

seysaban@yahoo.co.uk
//////////////////////////

 

آراء