أصل الحكاية
إصرار غريب من الطاهر يونس علي أن يظل مادة دسمة للسخرية والتندر في المجالس الرياضية ، ( وشهوة) رهيبة للسلطة أظهرها الثنائي الطاهر يونس وكاروي في الفترة الماضية ، أقول ليكم حاجة نخلي الكتابة بالفصحي لوقتها ، ونكتب بالبلدي الفصيح .
وخلونا من الفوضي وإستغلال النفوذ السياسي ، وخلونا من فشل الحزب الحاكم في سحب كوادره من الوسط الرياضي بعد أن أصبحوا بسبب ضعف إمكانياتهم وقدراتهم الإدارية خصما عليه ، خلونا من ده كله وتعالوا نضحك ونستمتع بالعرض الكوميدي القدموا الطاهر يونس علي مسرح أمس واليوم والأيام علي مسرح الرياضة المليان بالعروض الرياضية هذه الأيام ، حسب الإعلانات المالية الشوارع والكباري .
بالمناسبة كان في تبشير ليهو كم يوم بقرار ( سعيد) سيعيد الفرحة لجماهير الهلال الحزينة ، طبعا زي تباشير كتيرة ، شغالة ليها فترة بإقتراب موعد الفرح الكبير والمضحك في الموضوع بعد كل وعد جديد (بيت البكا) بكبر لحدي مالصيوان بقي مالي المدينة مش الحلة .
وظهر القرار امبارح وكان ( نكتة) ، نقول يالطاهر يونس (بين) بتاع التحكيمية راجل بتاع حكومة ومابعرف يفرق بين القرار الاداري والقرار الفني إنت الإداري السابق ماعارف؟ دي فضيحة يالطاهر ياأخوي ، يعني اسه انت فرحان و مالي الإذاعة والتلفزيون والجرايد بشنو؟ وتاني ترجع تعمل صيوان ، الموضوع واضح ده في علم الكورة إسمه ألف باء إدارة .
أول حاجة كيف مجلس شرعي ومامن حقو يصدر قرارات للشطب والتسجيل ؟ خلينا من ( بين) بتاع التحكيمية ، وزي ماقلت ليك نقول هو ماعارف ، إنت رايك شنو؟ لانه كده بكون زي السؤال بتاع الأول منو البيضة ولا الجدادة؟ بالمنطق ياابو الطا ياشرعي ياماشرعي .. دي واحدة .
السؤال التاني إنت عارف اللاعب لاعب منو؟ نقول هيثم وعلاءالدين ، طبعا حاتقول لي لاعبين الهلال وحسب كلام (بين) شطبهم غلط أو باطل ، لكن الماعارفو إنت انه هيثم وعلاء الدين لاعبين الاتحاد العام مالاعبين الهلال ، أشرح ليك براحة ماتندهش والموضوع ماغلاط ، إنت ماعارف قول ماعارف ، لكن ماتعمل فيها عارف وإنت ماعارف . أقول لاعب الاتحاد كيف؟ اللاعب لما يسجل بمشي يسجل في الإتحاد مابسجل في ناديهو ، ولما يتشطب بتشطب في الاتحاد مابتشطب في ناديهو، ابسطها ليك أكتر موضوع هيثم الأخير ، مش الاتحاد شطبو وتاني وقف شطبو ، ومش إستلم قروشو من الإتحاد ، ومش شطبو تاني يبقي ببساطة ياسيد ياجيد مفروض تقول أو يقول ( بين) شطب الإتحاد لهيثم وعلاء خطاء لأنه الهلال بوصي بالشطب والاتحاد لو لقي أي مشكلة في عملية الشطب بوقفو.
بعدين يالطاهر معقولة حتي أجسام الحكومة ماعارفها هيكلتها ، إنت مفروض تعتزل العمل الرياضي طوالي ، تحكيمية ( بين) أو إستئنافات ( بين) ولائية يعني لو عندها سلطة بكون حدها إتحاد الخرطوم المحلي ، لأنه في تحكيمية إتحادية دي كانت مسؤولة عن الإتحاد العام هسه ذاتو ماعندها سلطة الاتحاد العام بعد قرارات الفيفا الاخيرة وتغيير النظام الاساسي الابعد كل الاجسام الحكومية ، طبعا الكلام انت شايفو زي اللغة الصينية .
سؤال؟ لو صدقنا وآمنا بالمهزلة دي ، الاستئنافات او التحكيمية بتاعت (بين) حا تتطبق قرارها ده كيف ؟ عندها سلطة علي الاتحاد العام؟ ورينا آلية التنفيذ شنو؟ مافي طبعا ، لاعندها سلطة ولاآلية تنفذبيها قراراتها
أكسب زمنك يالطاهر يااخوي وانسي القصة ، الموضوع إنتهي . قلت لي (بين) قال ليك شنو؟
hassan faroog [hassanfaroog@hotmail.com]
/////////////
