تجمع المهندسين السودانيين: الخميس خميسك أهدي لي من فضلك بمبان من قميصك

الثورة ماشة زي الحلاوة وتغيير البلد و الحكومة تشيل وتكتُل و تضرب رصاص ..رصاص مطاطي ..غاز أعصاب .. بمبان.. الحاجات الكتيرة ديك الدافعين قروشها نحن من عرقنا وعرق ابواتنا وعرق امهاتنا واخواتنا ونحن ماعارفين أصلا هم جايبنها لي ياتو عدو ؟!

عدوهم نحن ديل وجايبنها لينا مخصوص ونحن اعتي واركز من كل العدة حقتهم دي .
عشان كدي الناس ديل نحن ماشين ليهم في السوق العربي يوم الخميس -ايي جوة العربي – قفل واحتفل ..نكتمها معاهم 6 صفر ؛ وغالبنهم كتير من بدينا لي يوم الليلة و كلكم عارفين الفرق …دمنا وعرقنا الولعنا بيهو رتينة الثورة دي ما ح تنطفي الا بي صباح اشقر وضاوي وبي مشاوير وغناوي بتشبهنا كلنا و بنكتبها علي كيفنا ؛ ما كيف الرمم ديل .الجناين المتسلبطين فوق رقابنا ليهم 30 سنة ؛لكن زي ما قال اخونا الجنوبي الفصلوهو مننا بي سياستهم :(بكره في زول بقول واي ) .

الشايلين مساطر وكارهين العساكر:
شوفو بكرة السوق العربي قشة عينًا من النوم ؛ صباح العمياء علي الكُحُل ؛ صباحات الله البي خيرهن نحن متوكلين علي الحي القيوم وجايينكم كلنا ؛كلنا يعني كلنا من بتاعين التكيل في البيوت لي البشتغل ورديتين ؛مبطلين شغلتنا كلها وجايينكم ؛ حتي اخوانا واخواتنا البنومو لما الشمس تطلع ديلك شفتوهم ؟؟ بكره ديل جايين معانا كمان وح نتعابط معاكم للنهاية وماشييييييين لحد ما تسقطوا ؛ اصلاً شغلتكم بقت نية وليكم 30 سنة ما قادرين تنجضوها ف شنو بكرة تجونا مردفين ما ح ندقكم ولا شي بس بنقول سلمية سلمية ضد الحرامية ولما نحس بيكم فترتوا بنعمل ليكم الشلل الرعاشي الكبير بالاعتصام بعد شوييية كدي ؛كلمناكم قلنا ليكم نفسنا طويل وح تتهردموا شوية شوية واتهردم المركب الشايلكم دا و كل الناس ثوار ثوار فرح يتكلم للاحرار .

ياكُلًكُم:
نحن اولادكم وبناتكم بكره بنشرفكم تب ؛ الجماعة ديل اعتقلوا اخوانا وعذبوهم لا وكمان تعذيب لحد الموت زي ماكلنا عارفين؛ يعني بعد كل قلة ادبهم وعدم احترامهم لينا الشغلة دي بقت فيها نكيرة وكضب وبدوها من جونا 89 ولسه شغالين فيها عشان كدي دايرين نحسمهم بي كلو عشان يتفكفكوا يشوفو شغلتهم وين ؟؟
ماتقولوا قاصدين البُقج البشيلوها ويجروا ؟؟ لالا
هُم و البُقج حقتكم دي دايرنها هنا دي في السودان دا يسقطوا ويتحاكموا ويدونا بلدنا وقروشنا وحاجاتنا المعاهم كلها من الدم السفكوهو لحد اخر شي دخل كروشهم دايرين حقنا كامل ؛ شوفتو لو في زول طالبهم حمًيرة عين ساي نحن دايرنها .
اها الشفاتة المهنيين البننتمي ليهم ديل قالو موكب بكرة اسمو موكب ضحايا المعتقلات والتعذيب عشان كدي نحن وانتو وكلنا بكرة موكبنا الساعة واحدة طق طرق السوق العربي ومكان الانطلاق والمسارات عارفنها وبتجيكم لي عندكم بس صبرآ يبل الآبري عشان بكره يشوفو شعاع ؛ المهم نكون هناك كلنا ومافي زول براو ؛كل زول براو حاجه ما كويسة هي سودانا بكرة من سودانا ناو .
وقرًط علي كدة يامعلم
سمبتيك ؟؟؟
6 فبراير 2019

#موكب_ضحايا_المعتقلات_والتعذيب
#مدن_السودان_تنتفض

https://m.facebook.com/story.php?story_fbid=1987700324865343&id=1965236333778409