mahmoudelsheikh@yahoo.com
الحسن ود الميرغني. ..الراجل العينوهو مساعد رئيس الجمهورية !!!…دعا مجموعة من الصحفيين عشان يقابلوهو فى الجنينة بتاعتهم الفى شارع النيل !!!!. سمحة المقدرة.
دعاهم لى شنو ….ماعارف…وهم زاااااتهم الصحفيين ما عارفين. ..حتى اسألوا عثمان ميرغنى !!!.
المهم….سألوهو الصحفيين ( ” دحين قاعد تمشى القصر الجمهورى ؟) …قال: ( هو كان بمشى…لكن الأيام دى مابمشى لانو ماخد إجازة مرضية عشان رجلو الشمال “كان معوقة كان مجروحة مابعرفو” ).!!
غايتو عزرو ده زكرنى حركاتنا أيام المدرسة الابتدائية لمن يسالوك انت جاى بسفنجة مالك !!
أها عرفنا إنك مامشيت القصر عشان رجلك معوقة…طيب الجنينة الناديت فيها الصحفيين ديل جابك ليها ماكوك ولا هليكوبتر ولا بساط الريح ؟!!!!!
تانى سألوهو : (انت ماقلت يالحبيب حا تحل لينا مشاكلنا فى 181 يوم !! الفترة ماخلاااص قربت) !!
شفتو ال181 يوم زعلتو لمن دايرة تجيهو جلطة…قال ليهم : (ما 181 يوم ياخ..قلنا ليكم 180 بسسس) !!
أحب الانضباط أنا ياخى. ا
شكيتكم على الله يالصحفيين. ..دايرين تكتلوه عشان فرد يوم ؟!!
انتو قايلينو سكت….ابدا. ..قال : (وبعدين ال180 يوم انا قاصد بيها لمن ابتدى الشغل… موش من أول ما اتعينت )!!
حسه ده ما كلام زى كلام الزول المديننو قروش ولمن زنقوهو عشان يرجعها قال أنا لسه ما صرفت ياخ!!
طيب يا مولانا. ..خبارك ما بديت الشغل. ..دحين يدك ماتكون بتوجعك؟ (دى منى انا)……قال: ( هو مابدا الشغل عشان الرئيس ما كلفو بأى ملف لحدى حسه…أها يعمل شنو؟ يمشى يقالع الناس فى ملفاتهم؟!!)…قال هو موضوعو هيييييين. .عشان يادااااابك هو معين ليهو ستة شهور بس !! …الكلام فى التانين الليهم ستاشر سنة مامسكو وريقة… خليك من ملف !!!
أها. ..سألوهو من صحة السيد الوالد.. نعلو ماممكون؟ !! قال: ( ابوى من شدة مانصيح بهازر مع الدكاترة).
سمح…هو وكت نصيييييح كده… البخليهو يشغل وقت الدكاترة شنو بالهزار ؟!! ..ما يمشى يهظر مع أى زول تانى ويخلى الدكاترة الليشوفو عياننهم ! !!
قال هو قدر ماناضم الأمريكان.. لكن غلبو كلوكلو يعرف هم دايرين شنو من السودان! ! ….لكن قال خلال زيارة وفد الكونغرس الأخيرة الأمريكان قالوا ليهو :(نحن بنرفع الحظر لو اتوفرت ظروف معينة) !!. …الكلام ده ماوااااضح. ..أكتر من كده يوروك كيف إنهم عاوزين شنو من السودان!! حتى بالبخرة ماقدرت تجاوب! !!.
دى زكرتنى صاحبى العاد الشهادة السودانية تلاتة مرات بسبب الرياضيات. ..فى المرة التالتة شال معاهو بخرة كتب فيها القاعدة ومعاها مثال توضيحى ! !!!
وحاااااااات الله جد.
تانى سألوهو : انت ده منو القال ليك تبقى رئيس مكلف للحزب لحدى ابوك مايبقى كويس؟….قال: ( ابوى زاااتو هو الكلفنى. ..ومايكلفنى ليه مدام انا قاعد معاهو فى قعر البيت !! )… انا الحتة دى كيفتنى شديد…ولقيت إنو كلامو صاح….حسه النسألكم انتو ديل. ..لو ابوك يوم قال ليك انا مابقدر أسوق العربية عشان رجلينى واجعنى تعال سوقها لى انت…أها بتقول ليهو حاضر ولا بتمشى تنادى ودعمك ولا جارك عشان يسوق ليهو؟ !! ( موش هى برضو عربيتكم ومسجلة فى المرور بإسمكم )؟!!
أنا لمن قريت اللقاء ده فى جريدة السودانى قلت كده النفتش لى جريدة تانية. .قريت جريدة التيار برضو! !!
غايتو الليلة ابوهاشم he made my day…
الله يحفظك ويخليك ويبعد عنك الدواعش …وعليك الله ياعمو الرئيس…الراجل ده اديهو ملف ملفين يشغل بيهم نفسو عشان مايمشى يهابش بلكات الكهربا الفى القصر تقوم تعوقو ليكم ساكت !!
اللهمَّ هذا هو حالنا. ..ومافى داعى أشرح أكتر من كده .
وأخيراً. …..سلام يا السايق (الفيات) !!
محمود ،،،،،
