بين تسقط بس وتقعد بس
الراس كبس
الغبش الغلابة ما لاقيه العدس
دايرين الستره كايسين العرس
الشعب غلبو تب ….عيان وانتكس
غالي الدواء ما في حق المِرس
دايرنو يصبر يجوع يقطع لحمه الخلص
الجوووع كافر بس انتو المغص
وحاشيتكم تعاني تخمه وافخم لبس
وِعَا المواطن الامر عليهومه إلتَبسْ
خيراتو تِتْنَهب وعليهو ضرائب المكس
تسقط تسقط تسقط بس
مافي حل الا تَقْسِطْ تَقْسِطْ بس!!
الشعب داير يطرد النجس للفساد يكنس كنس
ما بحموك الحرس
سيب الجِرس
خليك راجلاً كلس
يا بشه دَقَ الجرس….. حاتبقا من اللمس
احترم نفسك ما تنغمس ….راجييك الحبِسْ
اتنازل قبال ما تندعس وتترَفِسْ
العاقل بي غيرو اتعظ
انتا ما بتتعظ !
السوداني احسن جنس
بره البلد مالي مكانو
وجوه البلد خانو حكامو
بكره تفاؤل املاً سعيد زمانو
اكان ما الدنيا فرندقس
خيرات بلادنا تِتْلَحِسْ
يلا فارق دايرين نَفِكْ النَحِسْ
بقلم / حامد عبدالرحمن يوسف
توقيع ود المحس
hamedsudan@hotmail.com
