دا كلام يا عزو

من خلال زفة عرس حكومته الرشيقه كما تغزلوا فيها وحتى تكون العروس مطيعه لعريسها ويلزم اهلها جحورهم قام بذبح الكديسه فى مقولته الشهيرة {الصدمه} اى حكومة الصدمه حتى يستعد الجميع لما هو اقسى اها تحسبو لعب دى عريس عينو جمره اصلو جاى من انحاء الجهاد وشم ريحة المسك من دم الشهداء الماتوا فى الجنوب والسماهم الترابى الفطائيس

{طبعا لازم ادلعك شويه ما بتجى كده لما اقول ليك يا معتز ناشفه كده} اها علا يا ولدى يا عزو كدى تعال الزم الجابره دى النحدثك لانك عامن الجماعه هولك ديل بدو الحكايه كنت لسه شافع فى دربم الجديد دى اها من يوم صبحنا وكنا واقفين فى الفرن فى صف العيش بعد صلينا الفجر حاضرشفت كنا مسلمين وموحدين كيف وجينا وقفنا وزحينا الطوب والشباشب ووقف كل واحد فى محله دى كان في 30 يونيو 1989 الا بعد شويه النسمع الجماعه العساكر قلبوها عشان شغل الملكيه ما عجبم من الفرحه حتى حسنى مبارك ما قشه عيونه من النوم كويس ركب طيارتوا وجا بارك للشعب السودانى وللعساكر وساقو الجماعه السجن وهم للقصر عدييييييل اها الصدمه الاولى كانت الفرحه وبعد داك النوريك الصدم الجد
امسك الخدمه المدنيه عدموها نفاخ النار عشان يقدروا يتمكنوا
الصدمه التانيه تلاعب بالعمله مافى الا ليهم وامسك الجماعه الوارثين من اهلهم العيونم مليانه وبحقهم وعرق جبينهم امسكوهم وصادروا مش دولاراتم لا ارواحم ذاتها ولسه الفرامل فاكه والدقيش اقصد الصديم ماشى تعال يالراسك مليان علم وادب واخلاق وولد الاصول الاسمك بروف على فضل جيب نافوخك دى النقدو ليك يعنى قسما هتلر الكافر المابعرف الله ما عملا فى اليهود علا ناسك القالوا هم اهل الله سوو سواة الساحق والماحق مسكوا راس الفهم والعلم ودقوا فيه مسمار ايوه مسمار عديل كده ودى كانت صدمه لى هسه الزنزانه ما فاقت منها اها تانى شن نقولك وشن نحكيلك ما خلاص سعروا والشغلانيه بقت عاديه قبلوا على بعضهم الزبير القال لو شفتونا ركبنا عربات وبنينا بيوت اعرفونا سرقنا اها قامو لحقو امات طه وراجل الحنينه السكره الما بقدر قيمة الجمال والراميها فى الجريف لحقوا الزبير اها الصدمات دى خلت مهووسم الاسمو الطبيب الماهو طيب بتاع السيخ يفوت ويطلع بره الشبكه ما شاف بعينو ما كلمو شاف الزبير راح فيها قداامو ولحقوا راجل المره ....والمره نقلوها من الييت العشوائى فى الجريف لشاطى النيل والهواء العليل بدل هوا الدوكه وبى حيطة الجيران ادونا حتة طايقوه لى ناس الهوت دوق وماكدوننز والفنادق النجومه فى السما والبنوك والعملات البقت تحفظ اسمها زى ما كانت حافظه محطات بصات الجريف زمان ايام ما كنا نعيش الفقر فى عهده الاول .... وديدى دى صدمتها لى هسه ما قادره تفك منها من الجريف لى جروف النيل فى كافورى وتقول لى الكفار حطب النار
اها يا ولدى يا عزو الصديم دى كلو كوم وقالو لى ناس قرنق اها دى جنوبكم حلال عليكم ما فاضين ليكم خلونا مع اولاد عمنا ديل نصفى حساباتنا وبقى الدقش الجد بلا مشروع جزيره بلا سودانير بلا هيئة موانى بلا علاج مجانى بلا تعليم مجانى وبلا فقر معاكم ... ويا مليزيا ودبى والصين والما بعرفو شنو داك جوك الحفاة العراة يكدسون فى خزائنكم المنهوب ويسكنون فى فارهات القصور بلا كتاحه بلا هم لغاية تورنتو فى كندا ناس دولار وصلو واشتروا وبنو اها بعد دى كلو فى شيتين يصدموا يا عزو يا ولدى؟؟؟!!! غايتو الا ان كان تصدم نفسك من الخمج الجاى تشيل باقيهو ياخى ديل بعد صدمة قروشك حقتك ما بصرفوها ليك وطق راسك فى اقرب حيطه اها تانى فضل صدمه تصدما لينا الجلد تخن تب يقول لجلد التمساح انت حنكوش
طبعا بديت ليك الحكايه يوم صبحنا وكنا واقفين فى صف العيش وجماعتك جو عشان زعلانين كيف امهاتم وابواتم واخواتم يطلعو يقيفو فى الصف من صباح الرحمن عشان العيش ولاالغاز ولا البنزيم والوقت داك بترولنا لسه تحت الواطه ودهبنا ما طلع قالو عشان كده عملو حركتم عشان ينقذونا
يا ولدى ياعزو لحد يوم الليله منتظرين ينقذونا من نفسهم ويرجعونا لى عامن اول لانو الليله لسه واقفين فى الصف بعد تلاتين سنه وبعد البترول طلع والدهب طلع والدولار عيييك وزيت الشعب ذاتو طلع وبرضه واقفين فى نفس الصفوف لا كمان زادت ليها صفوف السفارات والصحارى والبحار وزى ما عمك حسنى مبارك اتصدم فى اديس لغاية مانسى محل الاجتماع ورجع حمد لبد وبالله حلف براس ابوه انو حلايب دى تبعه
اها يا عزو يا ولدى كان جد عايز تصدمنا صدمه جد جد وزى ما غنا الغناى شوفو لى حلل خارجنا من جماعتك ديل واتخارج معاهم او اقول ليك انسى الموضوع وخلى ناس الحركه فى شغلم لانو صدمتنا دى متعوده بس خايفين انت تجيك صدمه لما تلقا الحكايه ببح ومافى حتى مرتب سواقك ما يصرفو تقول ليهو لقط مصارفك لغاية ما اطلع من الشغل وفيفتى فيفتى اشتغل مع ناس ترحال اضمن تتطلع مصاريفك ومصاريف السواق بس ما تصدموا وتعدموا الفرطاقه خلى يرعى معاك لغاية ما ترحلوا قال صدمه قال

waladasia@hotmail.com