دينق قوج يرد على التوم هجو

د .التوم هجو فى مقام ابوى عمرا ..وخاطبنى اليوم بابنى دينق وفعلا انا فى مقام إبنه..ولمزيد من التعريف خلينى اعرف نفسى ليهو زيادة :-
1- 6ابريل الجاى دى بكون مرة على اول ٦ ابريل سيد الاسم ٣٦ سنة ..كنت صبى بجى من الرنك اشتغل يوميات فى الخرطوم بنزل فى بيت خيلانى فى اللاماب بحر ابيض..كنا بنخرج مع شباب وطلاب الحلة فى مظاهرات ضد حكومة نميري...
عمى التوم انا واحد من الشماسة الذى وصفهم نميرى وعمر محمد الطيب وابوقاسم ابراهيم بانهم مثيرى الشغب وليس هناك "فرد" فى الشارع من "الشعب السودانى "...وبعد سفره سقط وبعده استلم الاسلامى سوار الذهب السلطة الذى سلمه للصادق بعد انتخابات "مخجوجة"لصالح الاسلاميين بفرية (دوائر الخريجين ) والقصة هنا طويلة لشباب اليوم لكن دى الانتخابات الانت بتفتخر بيهو حتى الان والكان رمزك ( العصايا ) فى الاقليم الاوسط
داير اقول ليك هنا انا واحد من الشماسة الصنعوا تاريخك وتاريخ الانتفاضة وسقطوا نميرى ...
2- عم التوم انا اتأخرت على الرد لانو كل الأصدقاء سألونى انو عمك التوم اتحصل على الدكتوراة ده من ياتو جامعة و وين ومتين ؟ صراحة ما بعرف قلت اسأل الرفاق البعرفوك من زمن كنت بتجى الشرق مع مولانا الميرغني شايل شنطته ، والأصدقاء الكنتوا بتتلاقوا معاهم فى بارات ومطاعم اسمراء واظنك بتتذكرهم كويس وبتعرف منو الكان بدفع الشير ومنو الكان بيأكل و بشرب ويزوغ من الشير ....اكثر الاسئلة كان من الاخوة الاتحاديين الكانوا فى الشرق واسمراء ..على أساس انو الدكتوراة دى ظهرت بعد جيت الحركة الشعبية .المهم اظنه فى ناس دايرة تعرف ..خلى ناس مكتبك يوضحوا .....
بس الانا بعرفه كدينق قوج انك اتعينت وزيرا للصحة وقبل اداءك القسم حصل إنقلاب عمر البشير والاخوة السودانيين كالعادة يطلقون لقب دكتور على الممرض حتى عامل النظافة بالمستشفى او المركز الصحى ....لو غلطان صححنى لانك شهادة سودانية، و حفيد شيخ وما حافظ قصار السور ناهيك من "جزء عم"
3- طيب الرد ده علشان اوضح كلام فى البوست المرفق ...
أولا:- انا لم افتعل اى حرب اسفيرى مع اردول ..هو من فعل ذلك ...
ثانيا:- ليس هناك اى من يروجون للخلاف بين السودان وجنوب السودان بل حلفاءك فى حكومة السودان لا يرغبون ان يعرف الناس الحقيقة( ديون السودان على السودان ) ...
ثالثا :- لم أعلن عن اننى ممثلا لجنوب السودان فقط انا امثل شخصى فى صفحتى وامثل مواطنى الرنك فى البرلمان القومى للعام السابع عشر ..عليه اى معلومة لدى علم به من موقعى لابد ان أملكه لم يرغب فى ذلك ..واى معلومة خاطئة عن بلدى لابد ان اصححه كمواطن " صالح "
رابعا:- ارجو ان اوضح نقطة الخلاف مع اردول ويبدو انك وقعت فيهو ايضا ..هو ليس للسودان ديونا بطرفنا
ولم نتفق مع السودان بجدولتها بل العكس
لدينا ديون بطرف السودان .والسودان طلبت بجدولة هذه الديون، واللجنة الفنية من طرف جنوب السودان لهذا الامر ستكون بطرفكم نهاية هذا الأسبوع...هذه المعلومة مهمة جدا وقد كان سبب خلافى مع ابنك اردول
خامسا :- ليس لدى اى خلافات ارغب بتصفيتها مع اردول او ما اى شخص أخر على الميديا..فقط رغبت ان اقول ما اعلمه ليس إلآ
وشكرآ
إعتذار:- ما قدرت اسكت وحيات الله...فى معلومة وانا قلته وقت يجى زول ويكذبنى ما ممكن اسكت مهما كان ... اعتذر لكل الذين طلبوا منى ان لا ارد على عمنا التوم هجو او اردول من الاهل والاخوة والأصدقاء والرفاق هنا والخرطوم لاى سبب ...آسف ما قدرت وما بقدر اسكت فى القضايا العامة وارجو انو تسامحونى
يتبع .....