دينق قوج يرد علي مبارك أردول

مختارات ” الجريدة “ هذا المساء … الآن نفهم أن رحلة جوبا كانت لطلب المساعدة المالية……
قال : (قبل اسبوع قلت ان جنوب السودان اكملت "المساعدة المالية" للسودان البالغ قدرها 3.2 مليار دولار وفوق ذلك اصبح السودان مديون لجنوب السودان بكذا مليون دولار وكذا مليون برميل نفط ..أذن اخلاقيا مطلوب منى الرد على اى ادعاء آخر ينفى او يشكك فيما نشرته وهذا ما قمت بيه)
تنوية:- بينى وبين مبارك "عيش وملح " و"رفقة" سابقة" بالتالى بحترمه كشخص .لكن ولانه اصبح فى الضفة الاخري وفى دولة اخرى ويدافع عن مصالح اخرى أعتقد "تناسى"الاحترام البينا فسمح لنفسه بوصفى ببعض" الأوصاف " فى "تقديرى" اسقط بعض الأحترام بالتالى يا مبارك ، فى محاولة ردى هذا إذا سقط منى كلمة او كلمتين " حسيت بيهم كدا ولى كدا " فده بكون سببه لاننا فى ضفتين مختلفتين وكل منا يدافع عن مصالح ضفته ... يعنى ما شخصي على الرغم انت " هبشتنى "شخصياً
1- سبب هذا البوست ،كنت افترعت منشورين للرد على تضليل عام من وكالة سودانية حكومية عن ( قرب دفع جنوب السودان ديون السودان ) والحقيقة " عكس ذلك تماما " فقمت بالرد لاننى قبل اسبوع قلت ان جنوب السودان اكملت "المساعدة المالية" للسودان البالغ قدرها 3.2 مليار دولار وفوق ذلك اصبح السودان مديون لجنوب السودان بكذا مليون دولار وكذا مليون برميل نفط ..أذن اخلاقيا مطلوب منى الرد على اى ادعاء آخر ينفى او يشكك فيما نشرته وهذا ما قمت بيه
2-تصدى مبارك اردول مع اخرين كثر رافضين اولا "الدين " و"مساعدة السودان " وطلبات البرهان فى زيارته الاخيرة لجوبا وكذا رافضين لغتى او طريقة تناولى . سبب التصدى والرفض بعضها كان عن جهل بالحقائق وبعضها كان تكبر وسخرية عن قدرة جنوب السودان للمساعدة وبعضهم كانوا مستميتيين فى الدفاع عن حكومتهم حتى ولو بالكذب او بالتهديد او بالوعيد او بالهجوم الشخصي
3- وعدت مبارك اردول بالرد على هجومه ونقده لى فى البوست وفى الماسنجر وذلك عندما وصفنى بالتالي :-
3-1 - بشعبوى اى استخدمت خطاب عدائي شعبوى ضد السودان
3-2- تسأل بسخرية عما إذا كنت ملم "بمصالح بلدى" ..( دولة مغلقة ويعتمد اقتصاده على النفط ..ومنفذه الوحيد السودان ) والمفروض اتحدث عنه "بطريقة لايقة " يعنى بالدارجى كدا (ما تقلوا أدبكم )
واصل السخرية وقال إذا كنت تعلم بمصالح بلدك فهل كنت ستدخل فيسبوك بكلانشكوف؟
3-3-اتهمنى اننى اسعى لنصر اسفيرى
3-4- وصف حديثي بغير "مسؤل" ( وادانى محاضرة) فى كيف تدار الملفات بين الدول
3-5-وصفنى اننى أريد ترضية( الحاضنة السياسية العنصرية) الذين قتلونا وشردونا وفصلونا والنون ده للجنوبييين والمهمشيين ..الخ
3-6- اتهمنى باننى اخدم اجندة المعارضة السودانية.
3-7-اعمل على التضييق الإقتصادي على حكومة السودان لأسقاطها
3-8- اخدم مصلحة تجار العملة بالسودان لانه فقط بالاشاعات ترتفع الدولار وتنخفض ومنشورى جزء من الإشاعات المضرة بالاقتصاد السودانى
3-9-اتهمنى اننى اعمل ضد حكومتى لاننى اعمل ضد حلفاء حكومتى بالخرطوم.
-3-10-استنكر على تاغ الصحفيين( للدقة عملت منشن لدرة قمبو وما تاغ والسبب واضح للمتابع ..درة صحفية ...لكن مبارك قال صحفيين) Durra Gambo
لسانى اتكعوج ياجماعة.
تعالوا نتونس دارجى ...
المهم يا شباب مبارك اردول مسح بى الواطة فى العام وفى الخاص لكن داير اقول كلمتين وبس
اولا يامبارك انا بعرف بعمل فى شنو وبعرف مصلحة بلدى وحزبي كويس ،الحكومة فى الخرطوم حكومة امر واقع للسودان وبنتعامل معاها كدا وليسوا حلفاءنا يعنى انت ما حليفى يا مبارك ..ولا حكومتك ،حلفاءنا الشعب السودانى وارادته الانت سلبته مع حلفاءك الجدد وبقيت شغال فى تكسيره وقهره ديل ياهم ناسنا...
خلال شغلى الاعلامى والبرلمانى والعمل التنظيمى بالحزب بتكون عرفت قدراتى وانت عارف المهام الانا اتكلفت بيهو طيلة السنوات داخل حزبي . ده كلو ما ممكن اطلع ما عارف مصالح حزبي وين وحلفاء حزبى ومصالح بلدى وكيفية إدارة والتصدى لاى ملف وقنوات ادارة اى ملف وحتى لغة التصدى لمصالح بلدى او حزبى ،، بالتالى كل ما قلته كان (محسوب ومدروس ) يا مبارك. اللغة والمكان والزمان ...
وبكرره تانى
جنوب السودان الاستقلت إمبارح دى قدمت مساعدة للسودان مقدارها ٣مليار و٢٠٠مليون دولار ...ده مساعدة واستلمتوه كاملة ولسع مديونيين لينا بأكثر من ٧٦ مليون دولار ..وجنوب السودان بشكل يومى ببتروله المديون بشغل ليكم جزء من كهربتكم ومصافيكم وبشغل بجازه وبنزينه جهاز حكومتك وجزء من غاز الطبخ ...ده حقيقة....
ليه ما داير الناس تعرف الحقيقة دى و وقت نقوله تقوم تفقد وقارك وتصفنى بالاوصاف الفوق ؟
ليه المساعدات تسموه ديون ؟
وانو لسع دايرين متأخرات؟
انا طلعت لتبيين وتصحيح الحقيقة ونسمى كل حاجة بأسمه وفى نفس الحتة الطلعت منه ...
المهم بتغاضى عن محاولة الأستاذية المارسته معاى لسبب بسيط انو بعرف قدر نفسي تماما وبعرف ليه بتجاهل النوع ده من السلوك ...
يامبارك حلفاء جوبا ياهم الشباب والاحزاب الفى شارع ديل .والانت معاهم ديل ياهم القتلونا والدمرونا وياهم الهمشونا وياهم الرفعوا الجهاد ضدنا وياهم"الفصلونا "وياهم اللسع بقتلوا اهلك واهلى وبغتصبوا اخواتنا وبناتنا فى شوارع الخرطوم وفى جبال النوبة وجبل مرة وجنوب النيل الأزرق وياهم ....وياهم..وياهم... ديل ناسك انت لسببك انت ..وما ناسنا ...ما بتورينى ناسنا ناس منو ...اظنه خطابك الاستخدمته معاى فى العام والخاص ما "محترم" ....كيف ؟
لانك لغيت عقلى وحتى خبرتى البسيطة فى العمل العام وقربت تتهمنى بالغباء والجهل يا مبارك
المهم يا مبارك انت فى الضفة الغلط ياخوي وانت ما محتاج لوظيفة مهما كان أهميته ليك. انت شاب لسع عندك مستقبل وعندك قدرة تخدم اهلك وبلدك فى حتة نضيفة مع ناس نضيفيين انت ما محتاج للناس الانت معاهم حسع ديل ،،، ما تقول بعدين ده أستاذية منى ده وصية من اخ ورفيق سابق
فى النهاية اكرر ديل ما حلفاءنا بجوبا بل حكومة امر واقع فى السودان بنتعامل معاهم على هذا الأساس...
يتبع....