سكة الثورة

طلعوا الشباب
ماشين
في سكة الثورة
علي كوز عميل
وجبان
من شلة الظالمين
الكتلوا الاخوان
من شلة الفاسدين
السرقوا حاجاتنا
والقسموا السودان
بدل وطن وطنين
وطنين جنوب
وشمال
باكين عليهم دم
ساكتين ومافي
سؤال؟؟
عن نصنا التاني
واللسة بيعاني
من جوع وهم
ومرض
الهمو اضناني
ياوجعي ياسودان
علي نصك الضايع
الضيعوا الكيزان
الضيعوا الإخوان
إخوان حرامية
ديل نهبوا خيراتنا
ديل بدلوا السودان
ديل هدموا لي ذاتنا
ديل سكنوا كافوري
لاهم ولا احساس
لا بالوطن لا الناس
لا بي معاناتهم
لا بالوليد الجاع
في ظل تفاهاتهم
لا بالمرض و الدين
يحرق حشاشاتهم
لا بالسمح بالشين
غير طباعاتهم
الشعب عانى شديد
كان بالمرض والجوع
وحتي السؤال ممنوع
والحزن بعده دموع
و حتي الفؤاد موجوع
وللذلة مافي رجوع
لي سكة الاحزان
لما السؤال؟؟
ممنوع
ممنوع ورغم الجوع
الحرك الطوفان
الحرك الشبان
لي سكة الثوار
لي سكة الاحرار
والسكة صعبة
شديد
السكة ملوية
محتاجة صبر شديد
محتاجة طورية
محتاجة للشجعان
ابان قلوب حية
محتاجة للاوطان
بي نسبة نوعية
محتاجة للسودان
وحتي الجنوب الكان
في يوم مع السودان
القسموا الكيزان
كان سلة العالم
وكان بلدة الشجعان
الحرروا ام درمان
من شلة الطغيان
مستعمرا وجبان
خلونا ياخي نعيش
بي كل اريحية
ناكل لحم او عيش
ونعيش بي حرية
نعيش بي حنية
ناكل نعيش نحلم
حتي الصباحية
بي وطن كبير مليان
فيه الكنوز حية
لاقسموا الكيزان
لا عيشتو ملوية
السكة فيه واضحة
السكة دغرية
وطناً جميل بالحيل
وطناً صفى النية
شمال جنوب وغرب
شرقاً كمان ليا
يمه الشوارع دم
مليانة همباتة
مليانة رباطة
مليانة زندية
لقطاء و حرامية
بيتاجروا بإسم الدين
و الدين برئ منهم
الدين للمؤمنين بالجد
ما للحرامية
السكوا للثوار حتى
الصباحية
والدخلوا جوه الدار
بي كل اريحية
والجلدوا كنداكة
ابان قلوب نية
اولاد حرام لقطاء
خلونا في الكية
محروق حشى الامات
بي طلقة روسية
محروق حشى الامات
ومعاهم الاخوات
محروق حشا بنية
على اخوها داك الفات
لا رجعة لاجية
بي طلقة من خاين
مابشبة السودان
ولاعنده حنية
كتل وليداتنا
بي كل برود الدم
لاحنا يوم او شال
شال ياخ معانا الهم
لا شهد المرحوم
ولا عليه يترحم
ولا كان ليه ودالعم
رباطي قلبه حجر
كجراوي ما برحم
ياوالد استغفر ولدك
شهيد مامات ولدك
شهيد الهم
كل حلمه يحيى يعيش
في وطنا يتنعم
طالع عشان العيش
طالع عشان يحلم
طالع عشان الحق
ماشان يسيل الدم
الدم بسيل منه
وعليه نترحم
عشان نعيش احرار
بي رحمة الثوار
والله ماتندم
يابا الشباب الثار
والإنضرب بالنار
من عسكري وغدار
لا فيه حنية
لا لي وليد برحم
يايمه يايابا اولادكم
الشهداء باكر بزيلوا الهم
يايمة يايابا اولادكم
الشهداء باكر بزيلوا الهم
او سودانا يبقي عمار
و للشهداء نترحم
وسودانا يبقي عمار
وللشهداء نترحم
وباكر نجيب التار من
عسكري و غدار
طاغوت و مابرحم
وباكر نجيب التار من
من عسكري و غدار
طاغوت و ما برحم .

ترس ..
هذا النص يُعبر عني وقد تمت كتابته في بدايات ثورة ديسمبر المجيدة وتحديدا في شهر فبراير 2019 حاولت أن اوصف فيه ما فعله الكيزان فينا وحال بلادي وما تفعله كتائب الظل والأمن الشعبي في الثوار والكنداكات ، لا ادري ولكن اشعر بأن كل ما كتبته في هذا النص لا يساوي 1% مما فعله هؤلاء الاوغاد .

zlzal1721979@gmail.com
/////////////////////////////