عندنا تعارف .. بقلم: بابكر سلك

بسم الله الرحمن الرحيم

في السلك

*طبعا في ناس بتاعين وهمات

*اي شئ يعملوا ليهو راس وقعر

*زمان في حاجه اسمها خطوبه

*بجوا اهل الولد يقدموا انفسهم ويتقدموا للبت

*اسي بقت تعارف

*طبعا ما تعارف بين الولد والبت

*ديل بالذات بكونوا بعرفوا بعض شدييييييييييد

*والله يبارك العرفه

*التعارف بكون بين اهل الولد واهل البت

*يتعارفوا ويعرفوا الحاصل الماكانوا عارفنوا

*الاهل آخر من يعرف

*زمان البت بقولوا ليها جاك عريس

*تقول اسمو منو وشغال شنو

*شكلو كيف ولونو شنو

*اسي بتكون ناقشه ليك حنانو زاتو

*الزمن اتطور والبت بقت تجيب عريسها بي روجها

*اقصد بي روحها

*المهم

*الاهل يتعارفوا وبعد داك يدوهم

*في ناس في التعارف بعقدوا

*اهل العروس بخافوا الزوغه

*يقولوا ليك خال العروس ده مربيها من زمان ومسافر

*قلنا نحضرو عشان مابحضر العرس

*اي سبب المهم الولد يتوكر

*ولانو في تعارف بقوم

*ناس كتار بتعارفوا وبنكروا العرفه

*كان قابلتهم في المواصلات

*ينسوا ليك الكيك والبيبسي الطفحوهوا عندك عادي

*يكون ولدهم قام فوق

*اليومين دي كلنا محتاجين تعارف

*الواحد يكون صاحبك ولا قريبك

*تكونوا ليكم سته سنين ما اتقابلتوا

*محتاجين تعارف

*اخوك يمش ي امريكا

*يقعد تسعه سنين عشان يعمل ورق

*زي ده لما يرجع موش محتاج تعارف مع ناس البيت ؟؟؟

*المهم

*مع موضة التعارف الهلال عندو الليله تعارف

*وليهم حق يعملوا تعارف

*كل زول من بلد ديل بعرفوا بعضهم من وين عاد

*غايتو في التعارف حقو يكون بدل الاسماء ارقام

*المشكله الا يجيبوا عمك قوقل يترجم

*سته لغات واربعين رطانه

*ديل يتفاهموا كيف بس !!!

*الغريبه قالوا حا يأدوا القسم

*قسم بي محيك البدري ؟؟؟

*يعني كلو زول يقسم براهو

*اولاد البلد يحلفوا بالله العظيم وكتابه الكريم

*والمسيحيين يقسموا بالكتاب المقدس

*دحين ما بكون فيهم ناس تانيين بقسموا بي اكتل امي وابوي ؟؟

*ولو في زول بحلف بالمساير  والشعر الضفاير والنور الجهر

*وناس ما تستغربوا لو حلفوا بي هبل

*كلو شئ جائز

*الجنسيات كتيره ومختلفه

*وحرية الاديان مكفوله في البلد دي

*حقوا حكاية القسم دي تخلوها يا روشا

*خلوا الموضوع تعارف

*لكن اعقدوا طوالي

*اسي بكري المدينه موش قعد معاكم في بيت كردنه تعارف وقام فوق ؟؟؟

*خليهو بكري المدينه

*كروز ده دحين ماقعد معاكم تعارف في الواتس  وقام فوق لما شاف بت باب سويقه ؟؟؟

*كان تعقدوا ليهم

*كان تقولوا ليهم كردنه خالنا ده بسافر ولا زم يحضر العقد

*المهم

*كان صحي هلالاب

*اعملوا التعارف في بيتكم

*في ناديكم

*ناديكم يناديكم وعاملين طرش

*فصيل عبدالواحد قال عرس هنا مافي

*تعارف تم كهيه كرتا

*والقائد الميداني ماجد اسماعيل جااااااهز

*وفتش جنودوا قال ليهم

*جاهزين

*قالوا ليهو جهاد نصر شهادة

*اقول ليكم

*طالما بتجتمعوا بالواتس

*اتعارفوا بالواتس

*واعقدوا في النت

*الشبكه تخرخر

*كروز يمرق في المريخ

*المهم

*شفت كبير

*رسل نكته حلوه

*قال حلمان في مؤتمر صحفي

*روشا سأل جمال

*ياجيمي انت دولاراتك كم ؟؟؟

*الوالي قال ليهو قبل السؤال ولا بعد السؤال

*ماقلتوا فلس ؟؟؟؟

*فطومه مستني جبنتك في ناديكم ومعاي روشا

*ايها الناس

*لماذا رفض قادة التحالف اللقاء بالشروق ؟؟؟

*وهل فعلا وضعوا شروط منها عدم تداخل اسماء معينه ؟؟؟

*وهل فعلا اشترطوا الاتصال بي ناس معينين كمداخلات ؟؟؟

*وهل فعلا وهل فعلا وهل فعلا ؟؟؟؟؟

*المنهجيه والعلميه موش بتتطلب شفافيه ؟

*حتي محاربة الدكتاتوريه بتطلب شفافيه

*فكيف ننادي بالمنهجيه والعلميه والديمقراطيه

*ونشترط شروطا معينه لاجراء حوار من ضمنها اسقاط حق البعض في المداخلات ؟؟؟

*هل الكلام ده ماشي مع بعضو ؟؟؟

*هل فعلا وهل فعلا ؟؟؟؟

*سيد الغبينه بقابلك في اي مكان

*في اي زمان

*بقول ليك طالعني الخلا

*يبقي الشروط ماكان حبابها

*ونادر وقريش ما اظن بعجزوا عن الرد علي اي مداخله

*طالما تبنوا فكرا او كما حدثونا

*ايها الناس

*اذا اراد عبدالصمد السفر لمصر والاشراف علي البعثه

*يبقي مافي داعي من اساسو لي سفر حاتم زاتو

*كان يمشي عبدالصمد من اول يوم

*وخيرا فعل صديق بابتعاده

*وخيرا يفعل لو تفرغ للعمل التنفيذي الذي عرف به

*ايها الناس

*اخبرنا الاخ رمضان عوض علي

*فجعنا

*افتقدنا اول امس

*مريخيا شريفا نزيها قويا في حبه للمريخ

*انتقل في ريعان شبابه

*من ابناء غرب كردفان قرية ابو راي محلية غبيش

*كان يتابع اخبار الزعيم يوميا برغم بعد المسافه

*فالمريخ في قلبه بالداخل

*قريبا الي نفسه

*رحل وهو يبحث عن اخبار المريخ

*كان يمني نفسه بموسم استثنائي

*انه الشاب الخلوق يحي ادريس محمد

*اسألكم بالله ان تسألوا الله له الرحمه في هذا اليوم المبارك

*ولن نقول الا ما يرضي الله انا لله وانا اليه راجعون

*ايها الناس

*ان تنصروا الله ينصركم

*اها

*نجي لي شمارات والي الخرتوم

*يا والينا

*انا خايف يجي يوم نندم

*كهربا دفع مقدم

*موية دفع مقدم

*القرايه دفع مقدم

*الايجار دفع مقدم

*التلفونات دفع مقدم

*الكمساري قبل تركب يطقطق ليك دفع مقدم

*الحج دفع مقدم

*العرس دفع مقدم

*الولاده دفع مقدم

*هو زاتو المفلس الولاده ليهو شنو المفلهم

*حتي العربات بقت دفع امامي مقدم

*كمان العلاج بقي دفع مقدم ؟؟؟؟

سلك كهربا

ننساك كيف ومع مقدم  ما بتتقدم ولا بنتقدم حرم تندم

والي لقاء

سلك

b_silik@hotmail.com