قاعدين أمام الصحيفة بنشرب شاي، نحن حوالي (10) مر أمامنا بوكس بدون لوحات على ظهره 6-7 أفراد أمن بزي مدني، بعضهم مغطى وجهه، البوكس وصل لحد شارع المك نمر، ثم عاد إلى الخلف ليقف أمامنا، ولحد هنا مافي زول فاهم حاجة، القوة نزلت وعمّرت سلاحها (كلاش ومسدس) وحالة من الرعب سادت مقر الصحيفة، بدأوا بخطف التلفونات وأوأمر بالصعود على ظهر البوكس، الكلام دا بحصل وفي ضرب بالهراوات.
في البوكس بدينا نتكلم معاهم أن نحن صحفيين وقاعدين أمام مقر صحيفتنا، قلت لأحدهم أنت عارف اعتقال صحفيين يعني شنو؟. كلام الطير في الباقير. وصلنا أمن الولاية -العمارات ش 59.
أنا ومها دخلونا في صالة والزملاء وقفوهم برا، جاء واحد من الضباط سألني مالكم؟؟ قلت ليه تسألني أنا؟ جاء واحد تاني، سأل، قلنا ليه نحن قاعدين بنشرب شاي أمام الصحيفة وحصل الحصل، بأدب رجعوا لينا التلفونات وشالوا ديباجات بعضنا (صحفي مضرب) واعتذر لينا وقال دي تقديرات ميدان وأصابع اليد ما واحدة، قلت ليه السلاح والإرهاب لشنو.
المهم، فتحنا حوار مع ضابط حول المظاهرات وأسباب الإضراب. اتوكلت وقلت ليه البتعملوا فيه دا ما صاح، وانت حارس ليك جنازة بحر.
من صفحة شمائل النور على الفيس بوك
