جمال حسن سعيد: ركز في دي معاي يا منصور كويس. لرئاسة الجنوب في مرشحين. سلفا رمزو النجمة ولام أكول ال
منصور خالد: الهجمة.
جمال: الهجمة كيف؟ دا رمزو المعتمد بمفوضية الإنتخابات هو ال
منصور: الهجمة بقولك. مش اتهجم زمان على الحبيب النسيب قرنق و
جمال: يمكن. والله ماليهو حق. قرنق ما الزول البتهجمو عليه. لكن هسع هو نازل إنتخابات ورمزو ال
منصور: يا خي خليهو يشوفلو غراب يجزو
جمال: يا منصور! اللهم مطولك يا روح. الزول نازل إنتخابات ورمزو
منصور: الهجمة. كمان عاوز يتهجم على كومريد سلفا؟
جمال: دي إنتخابات. منافسة حرة.
منصور: يا خي دا سقط بدري. دا ابو السقوط ظاطو.من إتمرد في الناصر سقط عمودياً. دا سقطان سقطان.
جمال: دا تاريخ. هسع هو نازل إنتخابات
منصور: حيسقط يسقط يسقط. يسقط لام يسقط لام يسقط لام زول لمٌلام والقبر قدام نحن قبيل سن قلنا ما قلنا الطير بياكلنا
جمال: ما عشان كدي يا منصور عملو الإنتخابات واحد ينجح وواحد يسقط.
منصور: لام ينجح. غريبة. لام دا يسقط يسقط. هوساقط كم مرة.
جمال: هديء اللعب. أديهو فرصة يسقط ناني.
منصور: كمان عامل دكتور. أمسخ دكتوراة سمعت بها. (صمت) هو ما كان ينزل ضد دكتور قرنق لو هو راجل.
جمال: بس زمان ما كانت في إنتخابات.
منصور: دكتور لاقا دكتور. ود الهرمة. بقي لقى هواه وعاوز يضري. مالقى حكم الجنوب بالتمرد عاوز يلقاها إنتخابات.
جمال: يضري لغاية ما ينجح أو يسقط.
منصور: يحنن. يلقاها عند الغافل. والله بالإنتخابات ما يلقاها. شوقو. لو كتبوها ليه حبوب سكس ناير تري ما نديها ليه. دا جنوب الجيش الشعبي. وي يا. سلفا وي ي. عرمان وي يا. باقان وي ي. (يرقص وي يا وي يا) تحسبو لعب شليل وترتار وقيره. والله يسقط سقطة (صمت). إنت عارف حاجة؟
جمال: شنو بامنصور ؟ هو أهلو الشلك ذاتم ما دايرنو.
جمال: بسيطة يصوتو ضدو يا منصور. الإنتخابات أصلو عملوها عشان المادايرو تسقط حجرو. خليهم يشختو على النجمة ويسيبو
منصور: الهجمة. والله لام دا ما يجي في ضفر باقان أموم الشلكاوي. وباقان ما اترشح.
جمال: ركز يا منصور. باقان حر يترشح ما يترشح. ولام حر يترشح ما يترشح. اتفقنا؟
منصور: كتلتها.باقان ما ترشح، لام يترشح ليه؟
جمال: عشان من حقو يترشح؟
منصور: والله!
جمال: والله!
منصور: (بإنفعال) بالدم بالروح يا سلفا. خلى لام يشوفلو غراب يجزو. وكمان عبد الله علي إبراهيم دا. بس غرابو يكون عربسلامي كده!
جمال: وعبد الله دا دخلو شنو؟ دا عطبراوي زيّ.
منصور: الاتنين شايلوم طموح وكدا. محل ما تتلف يبنقرو ليك. عملولنا وجع وش.
جمال: يا منصور! أحسن نبقى على طريقة التصويت طيب. حيدوك بطاقة وتدخل وراء ستارة وتلقى رمز سلفا النجمه ورمز لام
منصور: الهجمة
جمال: الهجمة الهجمة يا منصور. إنت معلق في دي ليه؟ بس ما تصوتلو إن شاء كان رمزو إفلاطون ظاطو. كان رمزو فاتن حمامة ظاطها. كان رمزو نانسي عجرم ظاها! أشخت محل عجبك قدام النجمة بتاعت كومريد سلفا. سقط حجر لام يا منصووووور لكين بالتصويت.كدا زبطت أفتكر؟
منصور: يا جمال إنت مدودوى. هو منو القال ليك أنا ظاطو عندي صوت في رئاسة الجنوب؟ أوالله أنا مسجل ظاطو! بلاش نجمة
جمال: بلاش هجمة. ما زهجتنا يا منصووووور خالد.
(أنبنى النص أعلاه على مقابلة أخيرة جداً في الصحف علق فيها منصور على ترشيح لام أكول ضمن أشياء اخرى).
