راعي غنم ابليس الحازق

عمر التجاني

انتهت صلاة الظهر في في ليل قارس البرد والقر. عفوا هل قلت في ليل؟ لا.. صلاة الظهر عادة ما تكون عند حلول الزوال كل يوم. ولكن هذا البرد القاسي جعل نهاري كليلي. خرج حمد من المسجد مسرعا صوب الخلوة المواجهة للمسجد واختار ركنا من أركان الخلوة ليدس نفسه من هذا البرد. في انتظار الغداء القادم من التكية. ما أحسنه فتة اي والله فتة بوخها يلوي رغم البرد يا زول وريحة التوم باقة بق. الله، الله سيغمس يده بقوة في قدح الفته غير مبال بسخونة الفتة متناولا كعبور كبير من اللحم، وخير اللحم ما جاور العظم. يا زول كله سمح ما جاور العضم ولا بعيد، المهم اللحم يكون كتير وما فيه شحم، الله يقطع الدهن ويوم الدهن. بعد الغدا حرم ماني ماشي الجرف يا زول ده برد زراعة، الله يقطع دي الشقاوة. كدي خلينا في الأول النلهط اللقيمات والفتة الحارة، هن بقن لحيمات ما قلت لحم عضم كعبور كبير. ونشرب الشاي الصاموتي بعدين الله كريم.
بدأ الخلق يدخلون الخلوة زرافات ووحدانا بعضهم يهمهم بالتسبيح وبعضهم يشكو البرد وآخرين استغرقوا في أحاديث شتى. ظل يميز بعضهم ده عمر وداك عثمان وباكر وأخيه محي الدين شوف القيدومة لاوي عمته حسع يجي يكاويني. لم يعره أحد باهتمام لانه كان متكورا ويقوم بشد العراقي تحت امشاط رجليه ليتقي البرد ويصلح العمامة لكي يغطي رقبته.
نعم سيدخل حامل الفتة الحارة ثم يتبعة حامل جردل السليقة، ربما يكون احمد سليقة، والذي لقب بهذا الاسم لانه دايما يأتي حاملا جردل السليمة الحارة ينادي يا جماعة الدارين سليقة منو. بعد اكل الفتة الحارة يأتي المبروك حاملا كفتيرة الشاي الكبيرة ذات اللون اللبني او الاخدر الليموني. يا زول حس الكبابي تتطاقش.
وبعد برهة يجيك الوليد مقصوف الرقبة شايل كفتيرة فيها شاي مر لمن يريد شايا اقل سكرا.
اها انا ماداير شاي سكره كتير بنادي الوليد مقصوف الرقبة نسيت اسمه ويشد بقوة العراقي تحت قدميه الله يقطع السقط. يا ولد ما تداعي البرد الخلقه ربنا.
لكن يا زول احسن بعد ما تاكل الفتة الحارة احسن في البرد ده تمشي الجرف تجيب ليك قنقر عيش ريف ده برد قنقر تولع المنقد وتخت الجمر ولو معاهو كباية شاي بي لبن الله الله الله ويزداد البرد والجوع القاتل.
وفجأة سمع صوت منتقى ينادي بصوته الأجش لصلاة العصر انتبه لان الوقت مضى ولم تأت الفتة الحارة أصابه نوع من الزهول ماذا حدث وين الفتة الحارة ! لم يجد أحدا بالخلوة، أين ذهب القوم والخلق. الخلوق دي راحت وين وين الفتة الحارة وين الشاي. في تلك الأثناء دخل اللمين حاملا عصاة في يده، وسلم مالك يا حمد قاعد هنا ما جيت اتغديت مالك صايم وللا شنو؟ عم اللمين ده جنه وللا شنو صيام شنو في البرد ده. لا يا عم اللمين اتغديتوا ايوه اتغدينا وشربنا الشاي وحسع نصلي العصر ونمرق علي الجروف. لكن انا ما اتغديت قايل الغدا بي يجيبوه هنا
انت مسوى راسك القليد ده متين الغدا بي نجيبه هنا في الخلوة الاكل في المضيفة.
قوم ادخل على عماتك ديل في التكية أكان تلقا ليك حرف كسرة تأكله.
انت يا عم اللمين اتغديتو بي فته حارة وشربتوا الشاي المضبوط
عاين رويسه اي اتغدينا بي فتة حارة وشربنا الشاي.
طيب وانا.
انت يالمطرطش نسوي ليك شنو أكان قاعد ترعى في غنم ابليس.

 

tigana@myyahoo.com