رأي صريح
ygasim@yahoo.com
*نرفع القبعة مثني وثلاث ورباع لأبن الاصول عصام الحضري ونقول ليهو آسفين .. طلعنا نحن الغلطانين، ما تاخد في خاطرك وأمسحها لينا في وشنا .. أصلو اتسرعنا وما كنا شايفين غيرتك وولاءك للمريخ، كنا قايلنك بتتكلم جد وما بتهظر لمن قلت لا مريخ بعد اليوم وصدقنا كلامك لمن قلت سيكافا آخر المشوار، ولا يهمك يا حضري البلد بلدك والبيت بيتك .. ما فيها حاجة لو سافرت ليك يومين تلاتة تشوف اولادك وتطمن علي تعليمهم، ما بنقدر نقول حاجة .. الغلط مننا نحن الماعرفنا نوفر ليهم مدارس أجنبية تناسبهم وتناسب تعليمهم .. طبعا ما ممكن تكون مرتاح وقلبك مخطوف علي أولادك.
*ولا يهمك يا حضري .. زي ما انت كنت بتهظر .. برضو نحن كنا بنهظر شوية لمن قلنا حا نشتكيك للفيفا ولمن همت طلع من طوره وصرح تصريحاتو ديك .. انت طبعا براك عارف همت راجل قلبو أبيض .. الفي قلبو علي لسانو ، وما تنسي انو رئيس البعثة في شندي همت زاتو .. يعني انت تقوم تاخدو بالاحضان طوالي أول ما تقابلو وتقول ليهو .. صافية لبن، يقوم يرد ليك .. حليب يا قشطة.
*وبعد ما اتصافيت مع همت يا حضري، الباقي ساهل وانت براك عارف أعضاء المجلس كيف بقدروك .. تتصور يا حضري انو متوكل ما هان عليهو يجرحك بكلمة وكان مثال للحكمة .. متوكل ما اتسرع يا حضري زي الباقين .. قال للناس انتظروا شوية وما تصدقو كلام الجرايد ولا كلام الفضائيات .. قال ليهم سيبكم من من الكلام ده كلو وخلونا نشوف الحضري بقول شنو .. وفعلا ما خذلتو، زي ما سافرت فجأة وفجرا .. جيت راجع فجأة وفجرا، وكمان أبوجريشة ده يا حضري كلامو تاني .. تصدق يا حضري .. بعد كل الحصل ليهو من تحت راسك وجواز سفرك كان قلبو معاك وما طلعت منو كلمة واحدة كده ولا كده، أبوجريشة يا حضري قال الموضوع بسيط وما في داعي الناس تهول الامور وتكبر القصص، كان واضح انو فاهمك كويس ودي ما غريبة عليهو وعلي خبرتو في التعامل مع اللعيبة.
*ما تفهمنا غلط تاني يا حضري لمن نكلمك عن العملوه في غيابك ناس متوكل وأبوجريشة، ما قاصدين نمتن عليك ولا تشيلها لينا جميلة .. أصلو انت ما مشحود عليهم، في الأول والأخير انت لاعب المريخ، وانت يا حضري تستاهل أكتر من كده، في تضحية أكتر من العملتها دي، تسيب أولادك نص الليل وتمشي المطار تركب أول طيارة .. ومن المطار عدل لي شندي.
*المهم يا حضري رجعتك لينا بالسلامة .. وشوفتك ساي بالدنيا .. ما تفكر في حاجة تاني، ركز بس مع قراية الأولاد .. أصلو الأولاد نصف الحاضر وكل المستقبل.. ما تشيل همنا .. كفاية عليك همومك، نحن عارفين اليومين دي مصر ما زي زمان، لكن كل ما تلقي ليك فرصة تدينا طله وتخليك متابع الاخبار .. عشان محمد كمال لمن تحصل ليهو أي حاجة .. تشيل جوازك في ايدك وعلي المطار دغري، موضوع الفيفا ده هين .. الخطاب لسه ما مشي الاتحاد وحتي لو مشي .. ناس الاتحاد فاهمننا كويس ومتابعين الجرايد وأول ما يعرفو العملتو امبارح ويكلمهم المراقب في شندي انك موجود حا يفهموها طايرة.
*أها يا حضري .. بعد كده ما عايزين منك غير تكلم لينا صاحبك شيحة يقفل تلفونو ولا يغير نمرتو عشان ناس الفضائيات ديل يبطلو الشمشرة بتاعتهم دي، وطبعا نحن عارفنك ما بتقصر تقوم تكلم كمان حبايبك ناس المواقع ينشرو لينا كم خبر كده عن عودة المياه لمجاريها، وطبعا اليتيم ما بوصوه علي البكا وانت خبرتك معروفة في المواقف دي، ما عايزين تبكي لينا زي ما بكيت للأهلي .. نحن ما بنتحمل دموعك وقلبنا خفيف ما زي قلب حسن حمدي، انت عارف براك السودانيين ناس طيبين وعلي قدر نياتم زي ما انتو بتقولو.. كلمة توديهم وكلمة تجيبهم، وما تنسي كمان انت بقيت واحد مننا وفينا والجنسية براها بتشهد علي كده.
*وعشان نكون حقانيين يا حضري .. حا نكلم ناسنا كمان يتكلمو عنك بالخير ولو في زول ما سمع كلامنا وسمعت ليك منو كلمة ما ياها ولا قريت ليك كلام ما عجبك ما تصدق طوالي ونحن مستعدين نوريك هدفهم شنو .. ديل يا حضري ما بعرفو قيمتك والمهم قيمتك عارفنا نحن، أها يا حضري .. العفو والعافية !
آخر سطر
*ألعب يا حضري .. وأرقص يا حضري.
yasir gasim [ygasim@yahoo.com]
