الانقلابي الاحمق جبريل ح يواصل الهروب للامام لامن يخبط فى الحيطه خبطه ما يقوم بعدها.. لانه ما عاوز يسأل نفسه الوضع المعقد الهو فيه صنعو منو؟؟؟
امس شال زيادة سعر الكهرباء من القطاع الزراعى ختاها فى القطاع السكنى وقايل نفسه كدا عبقري وحل المشكلة..
هو عارف نفسه مزنوق وما عنده موارد و ح يظل يمارس سياسة التركية السابقة (زيادة الاسعار/ الضرائب) لانه مطالب بمبالغ معينه لازم يحققا من القطاعات المختلفة والخدمات عشان تدخل الميزانية كعائدات ..
المشكله انه زيادة الاسعار بتأدى بصورة مباشرة لانخفاض الاستهلاك ودا بيقود لانخفاض العوائد والتحصيل ويتحول مباشرة لعجز فى الميزانيات..
وكل ما تعجز ح يرفع الاسعار ويزيد الضرائب والرسوم ويشيل من هنا يختها هناك يشيلا من الجاز يوديها البنزين ويشيل من التعليم يختها فى الصحة ويشيل من الدقيق يختها فى رسوم الصادر وكل مره يقل الاستهلاك وينخفض العاىد وتتعمق الازمه..
وعنده جيوش ومليشيات وضباط كتااار وعربات لاندكروزرات محتاجين صرف..
هو عارف انه ما فى موارد حقيقية وقدر الفى محتاج استثمار ورؤوس اموال تدخل وموانئ مامونه ووضع امنى وسياسي مستقر ومحتاج مساعدات وقروض ومنح واعفاءات كانت موجودة حتى صبيحة الانقلاب الكان على رأسه الاحمق جبريل.. ودا ما بيتحقق فى الوضع الحاصل الان.
زول كان وزير ماليه مدعوم من اغلب العالم عشان ينجح فى سياساته . بكل خسة ودناءة وحقاره شارك فى انقلاب عشان يبقى (وزير ماليه تحت البوت) ويوقف اى دعم ويساهم فى افشال نفسه بنفسه يعنى دا الزول الوحيد فى العالم عمل انقلاب عشان يحاصر نفسه ويفشل فى وظيفته.
الكويس فى القصه دى انه بيساهم فى اتساع كتلة الرفض بوتيرة سريعة جدا والماعاوز حريات وكرامه عشان يطلع الشارع غصبا عنه ح يطلع لانه محتاج انه (يعيش).
