تبع أحداث قري ملي وآتية وبيرتينو غربى الجنينة هجوم القوات الحكومية على مناطق جبل مرة و أفادت الأنباء عن سقوط أعداد كبيرة من الضحايا المدنيين و “اعتبر العمليات في جبل مرة “انتهاكات” تستهدف المدنيين، وصنفها بأنها جرائم حرب تستوجب أن يحاكم عليها رموز النظام، وناشد الحزب في بيان، الخميس، جميع الإعلاميين والقانونيين بتسليط الضوء على الإنتهاكات وفضح النظام أمام الرأي العالمي والإقليمي، كما ناشد منظمات الإغاثة بدعم النازحين الفارين وتوفير الإحتياجات الأولية لهم.” الخرطوم 21 يناير
“الأمة ماتت لو مات الضمير”
أهلين سلام … أهل الوطن
الليلة من بعد الغياب
وغربة سنين
وطول الزمن
جيت حارقنى قول
وأنا مؤتمن
حبوبتى يا ناس البلد
لا قيتا فى أرض الحزن
عينيها تنزف دم سخين
شايلا الأسى فوق راسها
زى عُقَد المشاط
منسوجة شوك
موجوعه فى نص القلب
وسط الضلوع
كايسة النفس
عدمانه شهقة من الهوا
مخنوقة بى ألماً دفين
دايرالا كوز مويه بس
شان تطفى نيران الحشا
وتَـبِلَّـبو ريقا اليبس
لكين ياحسرة كيف؟
الكوز إندلق
لامن ولد الولد
مصروع وقع
دمو إنسكب
بى طلقتين
فى نص راسه
من “فارسا هميم”
عادنوا مع الرجال!
ووليدا زاتو
على التراب وقع إنكفا
عايمله فى بركة دموم
محفور قدود
زى غربال عديل
خمسين طلقة
فى جسمه النحيل
وروح عمرو القبيل
حوا أمَّ الوِليد
بت عمو أبكر
وحمانه حامل توأمين
مقسومة لى فلختين
ومفقوعه منَّ الضهر
ودانات تلاتة بى جنبها
وأخوها أدومة البِكر
مقطوع بيحبى بلا كراع
وبت خالتم
فطومة نوارة الفريق
مشقوقة شق
وبتينا يبكن بى شهيق
واحدة تهبِّش فى السدر
دايرا الرضاع
والتانية ترضع فى الصباع
وتشيل إيدينا تختهن
فى يد أمها
دايرا تجرها
لى فوق وتقوما
“يا أمى قومى كفاك رقاد”
وود عم موسى الضرير
راسو إنكشط من اللضان
شايلنة شيل
والنار أم لهيب
دخانها عاقد فى السما
خلا الدنيا ليل
وكل البيوت إتكومت
كيمان رماد
ضرَّاها الهوا
مافضلت قطية واقفه
على الأفق
و فيهن كم من رضيع
إتفحَّم حِرق
وأنا واقف ممحن
زى جماد
لابد أدسدس خجلتى
موجوع ضمير
لميت رجالتى بمعجزة
وناديت علي حبوبه
بى صوتاً كسير
حبوبة هاك
إيدى اليمين ممدودة ليك
وإيدى الشمال كان تسندك
إمكن أقدر ألحقك
وأقش ليك دمع الدموم
الجارى من عينيك بحر
ما إنتى ناسنك كتار
خلوكى محروقة حشا
عاملين سماسمرة بى محنتك
قاعدين يزاودوا على أساك
ويتاجروا بأزمتك
تجار حروب
شاريين سلاح بايعين
مدافع للكتل
والناس تموت
ماهمَّهم
مشغولين يحَسِّبو فى القروش
جاهدين يوردوا فى السلاح
ماعندهم غير الكتل
فى شان الكتل بقى بقرتم
حلابة تحلب فى القروش
أموال مكوما بالشنط
والله ماها قروش نصاح
حبوبتى يا دارفور سماح
أنا ما عندى وش
طال السكات
وأنا بالى راح
ما فكرت فيك
لا حنيت عليك
قات لىَّ أسْمعْ أحدثك
“خليكا من لوم النفس
بس أبقى راجل كلمم
إتناشر– تلاتاشر سنة
هنا عندنا
التاريخ وقف
بس هم لازم يفهمو:
“ألامة ماتت لو مات الضمير”
________________
عبدالرحمن إبراهيم محمد
بوسطن – الولايات المتحدة الإميريكية
27 يناير 2016
sonsofnubia@gmail.com
