حرب الجنجويد والجيش

سؤال للجنجويد والجيش؟؟

منو الخاسر؟
منو الربحان؟

منو السفك الدم الحرمان؟

وشرد شعبه في رمضان؟

منو الخلانا مجبورين نسيب ام در نسيب بحري والخرطوم نغادر ليك يا سودان؟؟

الم حرقة ونزيف وأنين نزوح قسري وفراق أوطان.

سؤال في البال على الخاطر منو الخسران منو الربحان؟؟

منو الفرحان وما ندمان على كل الدمار والموت وارض محروقة من سنوات؟؟

جنوب مقسوم غرب دامي شرق عطشان شمال نيران خريطة حزينة للسودان!!

بلاد النور بلاد بالعزة معروفة وطن مليان حنان فطري وطن بالخير ملان كيمان!!

سلام يا ناس سلام إنسان معذب بشقى الاوطان! معذب بشقى السودان وشايل همه ياخ حزنان!!

يفكر مرة في أمه بفكر في أبوه كمان أفكر جاي وأفكر جاي أسبح يرضي للرحمن.

أفكر جاي أفكر جاي!!!؟؟؟

ناس البيت كمان أهلي ناس الحي فريقنا زمان الطاحونة والطابونة ناس الحلة والجيران.

وحاجة السارة تضحك لي تزيل البي يخف ألمي تبسم لي وأكون فرحان.

شباب الحي وأصحابي وديوان بالضيوف مليان تهاظر دا وتضاحك داك تكون مرتاح وهادي البال وقلبك بالفرح مليان.

وفجأة كدا وبدون ترتيب بدون إخطار تجينا حرب بدون عنوان!!!؟؟

ضباط جيش مع الكيزان كتايب ظل مع الإخوان وجن راكب جواد دعامي ما إنسان.

سؤال تاني وسؤال تالت سؤال في البال على الخاطر منو الخاسر منو الربحان؟؟

منو الشال هم الوطن بالكوم منو القدم عذره لي شعبه قال ندمان؟؟

منو الكضاب؟
منو الغشانا بإسم الدين سنين وسنين منو الخلانا محتارين من الكتل شباب الثورة في رمضان؟؟

في الخرطوم كمان في بحري وام درمان؟؟

منو القفل أبواب القيادة زمان؟؟
منو الفضى الإعتصام الكان؟؟
منو الضيع ثورة سلمية وشباب الثورة في الميدان؟؟

منو الخاين عميل وجبان؟؟

منو الكتلنا في رمضان؟؟

سؤال محتاج لإجابة شرح سؤال في البال على الخاطر سؤال مليان؟؟

ود حمدان أمير آل دقلو في السودان؟؟

ام البرهان وقايد الجيش رئيس السلطة والسلطان؟؟

ام القحاطة والأحزاب وناس علي كرتي والكيزان؟؟

كتايب الظل دفاع شعبي وكتايب أمن طلابي وبراءون جهاز الأمن ياخ وسخان؟؟

هل الإخوان ام الشيطان يكون برهان يكون حمدان او الكيزان؟؟

سؤال جادي؟؟

سؤال في البال على الخاطر؟؟

منو الخاسر منو الربحان؟؟

منو السفك الدم الحرمان؟؟

منو الخلانا مجبورين نسيب
ام در نسيب بحري والخرطوم نغادر ليك يا سودان؟؟

وانحنا هناك مجبورين على الغربة السجم ورماد نشيل الهم ننوم بالغم ونبكي ننوح نشيل أحزان!!

نشيل دايما هموم في هموم نفكر ديمة في السودان بلاد النوبة والنيلين حضارة كوش أصالة عراقة روح إنسان.

وطن مليان بحنية بي طيبة كرم وأخلاق وروح فنان جميل الصوت نغم والحان.

أنا السودان حُب وحنان انا التاريخ انا الروح النقية جميلة انا الوجدان

مدن مليانة ديمة أمان محطات الوطن والشوق و إلفة جميلة في السودان.

ترس..
سؤال في البال على الخاطر منو الخسران منو الربحان منو السفك الدم الحرمان ؟؟

محمد زاهر ابو شمة

الخميس 14سبتمبر 2023

الرياض

zlzal1721979@gmail.com
>