مناظير الجمعة 30 اكتوبر 2026
زهير السرَّاج
manazzeer@yahoo.com
- والله يا إخوانا، أنا زعلان منكم زعل شديد، ليه تضغطوا على الحكومة عشان ترفع الحظر عن استيراد الفول المصري الطبقتو قبل ستة شهور .. ده كان أحسن قرار إتخذتو الحكومة في حياتها، وانا أول مرة أتفق معاها، لكن يا خسارة ارغمتوها تتخلى عنو !
- إنتو ما عارفين انو البلد في حالة حرب، والحرب عايزة قروش، والسلاح عايز قروش، والمليشيات عايزة قروش، والحكومة عايزة قروش، وإنتو همكم كلو الفول، يعني الحكومة تدفع دم قلبها وملايين الدولارلاستيراد الفول عشان تطفحوه، ليه الجشع والأنانية دي ؟!
- البلد في حالة تقشف، وانتو لازم تعملوا الواجب وتجاهدوا مع المجاهدين، على الأقل تبطلوا اكل الفول، ويا ريت كمان العدس، ولاَّ لازم الحكومة عينها تطلع عشان تستورد ليكم الفول؟
- لازم فول؟ أكلوا حاجات تانية … عندكم المشاوي والفراخ والكبدة والكلاوي والسمك والبسطرمة والسجق والهوت دوق .. ده كلو ما عاجبكم، يعني هي جات على الفول والعدس؟!
- ما سمعتوا بالمناضلة العظيمة “ماري أنطوانيت”، لما الناس المرتاحين البرجوازيين طلعوا مظاهرات في فرنسا قبل كم قرن كده، يهتفوا “عايزين رغيف، عايزين رغيف” والبلد مفلسة وما فيها مليم أحمر، قالت ليهم شنو؟ قالت ليهم: أكلوا جاتوه! بالله شوفوا نكران الذات ده! صحي والله .. الجاتوه مالو، عيبو شنو؟!
- إنسانة ضكرانة ومناضلة ومجاهدة، قاعدة تاكل في الجاتوه والشكولاتات والمعجنات، وسايبة الرغيف، والناس المرتاحين طالعين مظاهرات، يخربوا ويكسروا البلد ويقولوا عايزين رغيف، شوف بالله الأنانية والزلعة دي .. وفي الآخر يعدموها وتصبح أول شهيدة جاتوه في العالم .. بالله في تضحية أكتر من كده؟!
- سيبكم من ماري إنطوانيت، شوفوا الحلمان وكميل شمعون وجبريل إبراهيم، ومناوي، والقبة، والمناضل بتاع كتيبة البراء الاسمو منو كده طلحة، ديل كلهم مضحين عشانكم، وما بياكلوا حاجة غير المشاوي والمعاجن والبيرجر والهوت دوق، لمن بطونهم هوهوت، شوفوا التضحيات دي، وإنتو ما شايلين غير هم الفول والعدس؟!
- البلد محتاجة تضحيات يا اخوانا، ما كل يوم رغيف وفول وعدس! اتعلموا من قياداتكم نكران الذات واكل المحاشي والبلاوي، واخدوا منهم القدوة الحسنة، خلو الفول للماضي، وخليكم قدر المسؤولية! ما معقول القيادة شغالة من أجلكم، والبرهان تعبان وهلكان وحايم من ست شاى لي ست شاى، ومن راب لي راب، وانتو ما بتفكروا في حاجة غير صحن الفول، وكمان من غير زيت، طلعتوا زيت الحكومة ياخي، شوف جنس الجشع ده !
- الناس بدل ما تقعد تبكي على الرغيف والفول والعدس، تتعلم من المناضلة ماري أنطوانيت كيف تواجه الأزمات بالصبر والجاتوه! ما كل حاجة دايرينها تلقوها جاهزة، وما كل أزمة لازم الحكومة تحلها ليكم، شوية اعتماد على النفس يا جماعة، وشوية تغيير في المأكولات، أكلوا شاورمة، البلد ما شاء الله بخيرها وبى شاورمتها !
- انتو ليه مصرين على الفول كأنو آخر أكل في الدنيا! الحكومة قالت ليكم في حرب، قالت ليكم في مصاريف سلاح، قالت ليكم البلد محتاجة تقشف، اتقشفوا، ايوا إتقشفوا .. زي ما في ناس بتتقشف بالجاتوه، وناس بتتقشف بالكافيار، وناس بتتقشف بالمشاوي، إتقشفوا زيهم، عينكم لى جبريل ومناوي وطلحة والقبة وكيكل وغيرهم، ديل من كترة النضال والتقشف بطونهم كبرت وأصابعينهم ورمت !
- لازم تفهموا إنو الحكومة لمن حظرت الفول كانت بتفكر في مصلحة البلد، وعايزة توفر قروش للسلاح بدل الفول والعدس والكلام الفارغ ده، وتخلي الشعب يتعود على الجاتوه والبقلاوة والأكلات الشعبية دي، لكن يا خسارة، الناس البرجوازيين المرتاحين أصروا على الفول، وضيعوا على نفسهم الفرصة إنهم يضحوا من أجل البلد، ويتعلموا نكران الذات من القادة التخان ديل !
- كان ممكن نطلع من أزمة الفول دي بشعب جديد، ما بسأل عن الرغيف، وما بشتكي من عدم الفول، وما بياكل غير الشاورمة والكافيار والكنافة .. لكن يا خسارة، طلعنا شعب أناني جشع ما بحب غير نفسو وما بياكل غير الفول !
