خمسه وخميسه … بقلم: بابكر سلك

بسم الله الرحمن الرحيم

في السلك

•    والله دنيا
•    سبحان الله
•    قال لاعبين المريخ ما ادوهم حقوقهم
•    معقوله
•    حقوقهم !
•    حقوقهم بالحا ؟
•    الكلام الصاح لاعبوا المريخ  ما ادوا المريخ حقوقوا
•    ماحافظوا علي اسم المريخ الكبير
•    ماخجلوا من العيشه المعيشها ليهم المريخ
•    ما سألوا انفسهم المريخ ده يجازوهوا كيف
•    المريخ الاداهم الشهره والمال ونومهم في برج الفاتح فناموا علي الخط
•    ولا سألوا انفسهم المريخ ده لو شطبهم بجرة قلم (يسويها الله ) بمشوا وين
•    ناس ما اضافوا لتاريخ المريخ اي انجاز
•    قاعدين عاله
•    المريخ زي الضراف الآلي
•    قروش قروش قروش
•    المريخ ياساده قال ليكم قروشي اسع نااااااااااااااااااااااو
•    صدقوني
•    اذا ذهبتم جميعا لايسأل عنكم انسان
•    خليهو انتو
•    مشي ايداهو
•    بي غيرتو
•    وعزيمتو
•    وجديتو
•    وعشق الصفوه له
•    ومهما حزنا
•    ومهما نحزن
•    لم يرجع
•    وبقي المريخ
•    لكنه بقي مقطع الاوصال
•    نحفظ له ماقدمه من اجلنا
•    ولانحفظ لكم شيئا قدمتموا لينا
•    لاتراجع
•    لاصلح
•    لا استسلام
•    هكذا قالت الصفوه
•    صدقوني
•    لو فزتو علي الجيش في بلدو
•    مافي صلح
•    واذا احرزتوا كأس الكونفدراليه
•    بعض الصفوه يمكن ان تصالحكم
•    والبعض الآخر لا يصالح ابدا
•    لانه لن ينسي لكم عثراتكم الكتيره
•    اي جيل انتم
•    ده شنو عدم الاحساس ده !
•    المريخ دلعكم زياده
•    المشطوب بدوهوا مؤخر صداق
•    وكاااااااش
•    تقول لي حقوق اللاعبين !
•    المهم
•    نتفائل بابي عنجه
•    علي الاقل لابدلع لا بجامل وفي قلبه حرارة المريخ البنعرفها
•    بكيتوا بشاره ما بتخجلوا ؟
•    ظهرت اغنيه بنات جديده
•    بتقول
•    جاب الشيله دسته دسته وما تعدي
•    واقف رايق ولا هاميهو شئ زي النفطي
•    يوم سبسب سبايبو وغز كوعو وضيع البلنتي
•    الباقي بكره
•    المهم
•    واحد من الجماعه قال لي خمسه كيييييييييييييف
•    جره كيف دي شديييييييييييييييييييييييييد
•    قلت ليهو ياتو خمسه ؟
•    قال لي الخمسه الفي استادنا
•    قلت ليهو الخمسه الفي استادكم ياتها ؟ خمسات استادكم كتااااار
•    قال لي كتار كيف ؟
•    قلت ليهو زي بتاعت مازيمبي
•    قال ياريت لو كاريكا ماجاب الخامس ده
•    قلت ليهو خمسة مازيمبي اسمها خمسه
•    وبتاعت اول امس دي اسمها خميسه
•    يعني خمسه وخميسه
•    كاربوني كعب سمح ما المشكله
•    المشكله ميتت القلب وعدم الاحساس وضياع فرص سيد التسالي بجيبها
•    دايرين نتفحص حاجات كتيره
•    المجلس
•    الجهاز الفني
•    القطاع الرياضي
•    دائرة الكره
•    ومليشيات اخري
•    الاستاد زاتو حانتفحصوا يا دحيه
•    وكت جاطت
•    نعجنها للآخر ونلخها من جديد
•    كفاية
•    مجلس شغالين اتنين والباقي مامعروف وين ؟
•    لكن الواجعني انو لاعب في المريخ يطالب بحقوق
•    الاختشوا ماتوا
•    مجلس المريخ لو ذهب كلو وفضل نفرين مافارق مع الصفوه
•    واللاعبون لو مشوا كلهم ومافضل فيهم زول نهائي مافارقين مع الصفوه
•    برا لمه
•    تاني التسجيلات قبل الفحص الطبي فحص درجة حرارة القلب

سلك كهربا
عليك الله ماتجيب لي سيرة نسيانك دي تاني

والي لقاء
سلك
babikir maki [b_silik@hotmail.com]