اشياء كثيرة فى عالم الاتصالات انتهت موضتها تماما مثل ( مسكل لى او ادى رنة و افصل ) و ذلك نسبة للمنافسة الشديدة بين شركات الاتصالات ( و نسال الله ان يديم المنافسة بينهم ) بحيث وصل سعر الدقيقة الى جنيهات قليلة و فى معظم الاحيان تتمتع بمكالمات مجانية لا تعرف فى دماغ من من الاصحاب او الاخوان ستقوم بافراغها فلا داعى للتوفير و ذلك فى ظل اجواء البلاش التى نعيشها .. كما انتهت موضة المعاكسات وهى ان يتصل بك احدهم من رقم ما و يسمعك اغنية فيها ملامة : يا غايب عن عينى مع انك فى قلبى .. او اغنية فيها قطع علاقات ثنائية مثل : انت رجع لى رسائلى و الرسائل العندى شيلها و موش كده بس : و الصور لو قلت برضو يعنى ما فى خط رجعة تانى .. ؟؟ و ما الى ذلك من تلاعب بالاعصاب و الوقت .. فلا داعى لكل هذه الحيل باصوات المطربين فقد اصبحت الامور جايطة و العلاقات اوضح من العلاقات السودانية الاسرائيلية و لا داعى لكل هذه المقدمات فى الحب و الهيام .. ؟؟
و بالرغم من موضة اللخبطة فى الارقام و الخطا فى الاتصال انتهت تقريبا فى عالم الديجتال حيث اصبحت الارقام مخزنة كلها خلف اسماء مرتبة هجائيا على ذاكرة التلفون بفضل الله تعالى ثم بفضل التكنلوجيا الا انه و على ما يبدو فان هذه الظاهرة لم تنتهى معى شخصيا .. و لا اعلم او اجزم ان شركة ما او شخص ( ود حلال ) قام بوضع رقمى على محرك البحث لدى العم قوقل و باسماء مختلفة بحيث اصبحت اتلقى يوميا اتصالات خاطئة و فى اوقات مختلفة و اليكم هذه النماذج التى وصلتنى خلال الشهر الماضي .. بعد الرنة الثانية اجبت على التلفون : الو مرحبا .. المتصل رقم 1 : بتعرف قدر ايه بنحبك يا استاذ .. اجبته و انا كمان بحبكم .. المتصل 1 : و يا اريت كنا فى الدائرة الانتخابية بتاعتك و الله يا شيخنا انا و اولادى كنابنعطيك اصواتنا بدون مقابل فى الانتخابات القادمة .. ؟؟ انا : عفوا يا اخى انت مين طالب .. ؟؟ المتصل 1 : انت موش مصطفى نائب البرلمان في دائرة دنقلا .. ؟؟ اجبته : لا يا اخى .. المتصل 1 : مكتوب على النت تلفونك ده .. أجبته : يا اخوى حظك وقع فينى .. ؟؟ متصل اخر الساعة التاسعة صباحا .. السلام عليكم يا شيخنا انت البركة و الخير و صوتك يا شيخ فيهو البركة و كلك بركة .. فشكرته على هذا الثناء العطر ( صدقت نفسى باننى قد اصبحت شيخا ).. فسالنى : يا شيخ انشاء الله السنة دى ما تنسونا .. ؟؟ اجبته : عفوا انت عايز مين يا اخى .. ؟؟ اجاب : انت موش جمعية طيبة الخيرية .. ؟؟ لا يا اخوى النمرة غلط .. و لكن الجمعية دى ذاتها صادروها ناس لجنة التمكين ..و الله يا اخوى مكتوب الرقم ده فى جوجل باسم شركة طيبة الخيرية .. اجبته : حظك جاء وقع فينى يا اخوى اتصل بناس وجدى و صلاح مناع .. ؟؟ متصل ثالث يسال عن صحة رئيس البرلمان السابق ابراهيم احمد عمر حيث يعتقد باننى مدير مكتبه السابق .. فاتمنى له الشفاء .. يعتذر .. و رابع يريد ان يتكلم مع مفتى السودان فى قضية شخصية و ان الرقم وجده فى الفيس بوك .. الخامس : الو الدفاع المدنى كوستى يا جماعة حصلونا فى حريقة فى دكان عثمان الشايقى.. ؟؟ و السادس : الو مستشفى الخرطوم قسم الولادة .. ؟؟
اما اطرف المكالمات فكانت يوم امس .. فبعد ان قضيت يوما كاملا و شاقا و معاناة شديدة من العطش و بعد ان غسلت راسى بالماء البارد و تمددت تحت المروحة .. و بالضبط فى حوالى الساعة الثالثة عصرا ( او ظهرا لا اعلم ايهم صحيح ) رن تلفونى و بنعاس شديد و تعب اشد اجبته : الو .. ؟؟ المتصل : كيف الحال يا استاذ حمد.. اجبته : مرحبا بيك .. المتصل : عقبال عند اولادك و احبابك عايزين نعرس للولد و نرتاح منه .. اجبته الف مبروك و عقبال باقى العزابية .. المتصل قلنا نحجز من هسع يمكن يكون عندك زحمة برنامج .. ؟؟ سالته : تحجز شنو يا اخوى .. ؟؟ المتصل : موش انت الفنان حمد الريح .. ؟؟ اجبته : لا و الله يا اخوى انا ما الفنان حمد الريح انا المواطن التعبان حمد مدنى .. المتصل : يعنى ده موش رقم حمد الريح .. ؟؟ اجبته : لا يا حاج .. .. المتصل : الاولاد طلعوا الرقم ده من الملعون ده .. البيقولوا ليهو .. اللهم صلى على النبى .. قاطعته و بطول بال قلت له : شنو الملعون هو الطلعوا منو يا حاج .. ؟؟ المتصل : طلعوا رقمك من .. من النت .. أجبته مرة اخرى : لا انا لست حمد الريح .. المتصل و باصرار : عليك الله انت ما حمد الريح .. ؟؟ قلت له : اقسم بالله العظيم انا ما حمد الريح .. ؟؟ المتصل : طيب فى رقم تانى اخره ٩١٢ بيكون لحمد الريح .. ؟؟ اجبته : ممكن يكون رقم حمد الريح اخره برضو ٩١٢ .. او الخطأ ممكن من الكمبيوتر فى الجد الثالث و الرابع هو اسمه حمد الريح على حمد و انا اسمي حمد مدنى حمد على .. ؟؟ المتصل : يعنى لو ضربت عليهو حيجاوب .. ؟؟ اجبته : طبعا يا حاج حيرد عليك حمد الريح انسان متوأضع جدا .. المتصل بإلحاح شديد : قسما بالله قالوا ليه ده رقم الفنان حمد الريح .. اجبته : يا حاج فلندعوا الله فى هذه الأيام المباركأت ان يشفى حمد الريح و يعافيه من كل مرض و مكروه الم به و ان يرفع البلاء عنه أنه سميع مجيب الدعاء ..
حمد مدنى حمد
hamad.madani@hotmail.com
////////////////////
