يا حارس النفر القماح
هاداك قطار الثورة صاح
دمدم هديرو على البطاح
شُبانا والشابات نُصاح
ماسكين مسار الثورة صاح
يا حارس النفر القماح
ما تغطى وشك بى وشاح
قاديه من طرح الحرملك واللفاح
داكا الكبير سيدالسماح
صرف الأوامر لى رجال الأمن
والشرطة القباح
أداك قفاه و بدرى راح
ودخل على غرفات حريمو
السادرة فى خدر النكاح
يا حارس النفر القماح
لملم عزالك
واتكل
أرمى السلاح
للخلف دُوُر
أفتح زنازينك
وباب حراساتك والسجون
واطلق صراح كل اللكان فى قبضتك
وعليك كمان أن تستقيل من مهنتك
ومن كل بيت تطلب سماح
عن دم مصون – غير مستباح
يا حارس النفر القماح .
هاداكا ديك الفجر صاح
دُغشيَّة بشر بالصباح
ونحنا بنقيف
نستنى فى شمس الظهيرة
وضياها يطرح فى حواكيرنا وجحورا
شُبان صغار استشهدوا
ومن غير قتال
والناشطات الرافعات شرف النضال
رهن العسف والإعتقال
من أى ملة وياتو دين
جيتونا زى قدرا لعين
من يات مفارخ ، صُممت
للغدر والحقد الدفين
أهو دا الحصل للمسلمين
ياهم قيادة المسلمين
+ + +
يا حارس النفر القماح
القصة ما قصة رغيف
القصة ما قفة ملاح
القصة قصة شك وخوف
واتعمقت فينا الجراح
من كل ظالم مستبد
من كل حاكم شاللو سيف
وعصاية ترقش ،
وعمة ناعمة مزركشة
فوق كتفو شال
زى طرحة فوق بت الصفاح
الزهد والورع المزيف
والتمثُّل بالصلاح
أدوات من النصب الرخيص
مخصوصة لى جمع الفلوس
تجنيب ، تحلل ، وانبساط
ياهو اللعب بين خد وهات
والقصة ما قصة صفوف
بى ذلة واقفة وانبطاح
بنزين وغاز ،
والكاش خفيف ،
قدر المتاح
القصة قصة وعى بالحاصل ، صراح
بالسطو والنهب المصلح والمخيف
الفى بلدنا عشش واستراح
وفى فايل العفن اللى فاح
ولامن سألنا وقلنا كيف ؟
وُوُجِهنا بالرد العنيف
وملافظ أبناء السفاح
وكلاب تعضعض فى الضعيف
ونفخة الشر ، وحدَّ الإفترا
والفلسفة العرجا . . ونظام القرضمة
وكأن فرعون الإله
راجل أمُّو ، بل قد أباه
ما تفك زرارة
وتانى ترجع عطبرة .
ويا حارس النفر القماح .
ويا ماسك الأمر الزمام
القصة إنك زول سخيف
فاقد المقام والإحترام
فاضحنا ، شايل حسنا
بى شحتة الدول المجاورة بإسمنا
وحاجات كتيرة تمسنا
والأدهى إنك لا بتقلل ،
لا بتقيف
لا وَشِيكا يعلوه الكسوف .
///////////////////
