بسم الله الرحمن الرحيم
في السلك
*من اشهر جرائم الاموال ورجال الاعمال في هذا العصر
*هي قضية صقر قريش
*تلك القضيه الخطيره التي شغلت الراي العام العالمي قبل المحلي
*وحتي لا تضيع حلقاتها وسط غبار الدنيا الكثيف
*راينا ان نعود لها بالتفصيل
*تفصيله تفصيله
*لن نكتفي بماجري داخل اروقة المحاكم
*بل سنتعداه الي اسباب الجريمه والدوافع
*ولماذا كان صقر قريش
*اعذرونا لو تطرقنا لاسماء في حياتنا
*لها علاقه قويه بالقضيه
*وكانت السبب الرئيس في ما آل اليه الحال
*بعضها خرج زي الشعره من العجين
*وبعضها يتاوك بين الحين والحين
*قانونا هي من اشهر القضايا التي نظرتها المحاكم
*واعرف زميلة قد حضرت رسالة الماجستير فيها
*ولان دوافع المجرم ليست محل اهتمام كبير للقضاء
*فلا يعتني القضاء بالدوافع حتي ولو كانت نبيله
*ولكن تأخذ المحاكم بثبوت من عدم ثبوت الادانه وفقا لادله قانونيه محدده
*ولا يهم بعد ذلك الباعث لارتكاب الجريمه
*فلو زول كتل مثلا
*وثبت قيامه بالجريمه
*واعترف بها
*فلا يؤخر القاضي الحكم الي حين اكشاف السبب الباعث للجريمه
*لذا سنخوض للاسباب الباعثه للجريمه
*نفتها زول زول
*المهم ان يعرف الناس كيف تمت الجريمه
*ومن ارتكبها
*ولماذاااااااااا
*ابقوا معنا
*المهم
*اتفق اولادنا علي العمل ببيت الشعر القائل
*ولدا بخاف القبيله تلومو ****بخلف رجلو فوق تيسا رقيق قدومو
*ماتيس ساي
*تيس بمواصفات وشروط
*لازم يكون رقيق قدومو
*المهم
* الحبيب معتصم محمود امس كتب وكلمنا عن جمارك عربية كردنه
*وقال لي امشي كسر تلج بعيد
*اولا كل سنه وانت طيب يا استاذنا بمناسبة عيد الام
*ثانيا بمناسبة الجمارك ,جمارك عربات الجنوب (سابقا) دحين بتجيب كم مستشفي دولي ؟؟؟؟ ماقلت لينا
*ثالثا كسير التلج انا مابعرفو ومابقدر عليهو
*لانو بحتاج لي معينات
*شركة مثلا تقبض تمن الكسير
*ولد من الخيال (العلمي ) يبقي سبب لي تمن الكسير وداعي للقبض الدولاري
*وده كلو ما عندي
*تاني كلو سنه وانت طيب
*اما فطومه اختي
*قالت من ضمن كلامها انو الخرطوم تلاته من ارقي احياء الخرطوم
*المعلومه ناقصه يا فطومه
*والسبب الكماسره دائما بتبرعوا بالمعلومات ويدوها للزول ناقصه
*اول من الزول ينزل في السوق الشعبي سابقا
*يتبرعوا ليهو بمعلومه ناقصه
*يقوم يصدقها
*صحيح الخرطوم تلاته من ارقي احياء الخرطوم
*لكن العباسيه وكوبر والاشلاق برضو راقيات
*والعرضه شمار برضو راقيه
*اقصد العرضه شمال
*ومع احترامنا للخرطوم تلاته ارقي منها
*الله يجازي الكمساري
*يدي المعلومه ناقصه ويقوم جاري
*اما عن سؤالك عن جمال محمد عبدالله الوالي
*شخصيا ما بعرفو اكتر منك
*الراجل معاك في حزب واحد
*وبالاصح قائد من قادة حزبك البتنتمي ليهو
*ولا اظنك تشككي في نظافة قادة حزبك
*وبالذات هو حزب اشتهر بالنزاهه مما جعلك تنتمين له بكل فخر
*يبقي اي كلام في نزاهة الراجل سنترك لك فرصة الدفاع عنه
*فالمبادئ لا تتجزأ يا فطومه يا اختي
*وتاني روشا لو قال كده ولا كده
*مابنرد عليهو
*تردي انتي لانك زميلة للرجل في الحزب والمبدأ والنزاهه
*وسأل احدهم
*لماذا كان يعمل جمال مع صلاح ادريس
*العمل مع صلاح ادريس جريمه ؟؟؟
*طيب روشا ده كان بعمل في بنك باركليز !!!!
*مابرضو كان بعمل مع صلاح ادريس
*فيها شنو يعني
*حيرتونا
*ايها الناس
*فيصل موسي وين ؟؟؟؟؟
*حي الزول ده !!!!
*جوهرتين ما شفناهن
*لا الجوهرة الزرقاء ظهرت نتيجة الفحص واخدت العلاج
*ولا الجوهره السوداء لعبت وامتعت
*جواهركم ديل فالصو ؟؟
*فالصو يعني صفر
*صفر يعني لاقيمة له
*واتصفري
*ايها الناس
*لمحت لي اربعين الف دولار لافه حول الكوكي
*ياربي حقت منو ؟؟؟؟؟
*ولا نوديها البوليس مهملات !!!!!
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*بعيد الام اقمنا احتفالا لينا
*عظيمة هي الام يا والينا
*وخسران من فارقها وهي منو حزينه
*لابكسب في دنيا متعه ونصيبو عذاب الآخره مهما الدنيا طالت سنينا
*قال عبدالله بن عباس رضي الله عنهما يا والينا
*لا اعلم عملا اقرب الي الله عز وجل من بر الوالده
*تكاد تغالبني عيناي وانا اسمع كلام الرسول صلي الله عليه وسلم الذي به اقتدينا
*يقول الرسول الكريم عليه افضل الصلاة والتسليم يا والينا
*الوالدة اوسط ابواب الجنه فان شئت فأمسك وان شئت فدع
*امسك باب الجنه او تدعه
*وكيف يدع الانسان باب الجنه يا والينا ؟؟
*يدعه الواحد فينا
*لما يجعل امه او ابوه يبكيان
*العياذ بالله يا والينا
*ولا نعش يوما فيه علي ست الكل نكون قد جنينا
*اللهم انعم بالصجه علي الامهات البيننا
*وارحم من صارن اليك يا ربنا
*وتقبل دعائنا لمن لها ابن عاق لا يترحم عليها
*واقبل دعائنا لكل النساء الصارن اليك دون ان يتركن خلفا يدعو لهن يا ربنا
سلك كهربا
ننساك كيف والبلد كلها فرحانه وتغني ,,,,امي الله يسلمك
والي لقاء
سلك
b_silik@hotmail.com
////////////
صقر قريش 1/1000 .. بقلم: بابكر سلك
لا توجد تعليقات