(اتذكرت هذا المقال القديم .... مشيت نفضت منه الغبار... لمن شفت فصاحة غندور وغازي وناس الشعبي ديل.. واضح انه الرساله ماوصلتهم .. وهي رسالة لكل بني كوز مهما تغير لونه)........

نقول إبتداء بعد السلام للدكتور غازي ولكل من وقف ضد حلمنا بالحريه عندما غرس نصل الإنقاذ في صدر الديمقراطية ذات صباح قبل ثلاث عقود... 

الانقاذ لم تلتقي بها صدفة في دروب الحياه..بل انت جزء اصيل منها صنعتها وحملت السلاح يوما دفاعا عنها....وعشت حياتك تحلم بها........فانتم جزء اصيل من هدم الديمقراطيه..وتشريد المخلصين..وتعذيب الشرفاء...وتمكين رفاقك في نهب ثروات شعبنا..ولن ننسى تصريحك بان الإنقاذ هي حلمنا الذي كرسنا حياتنا من أجله

وان الإنقاذ هي السفينه التي ستنقذ شعب السودان.

شرور الانقاذ ومساوئها لم تبدأ يوم مذكرة العشره..ولن تنتهي بعودتك لتكمل ما بدأته
فماكان الوطن جنة الله في الارض واصابته اللعنه بعد ان فارقتم الانقاذ........
ومنذ ان اختلفت مع رفاقك لم نسمع لك ادانة لتاريخك ومواقفك..بل لم نسمع لك مناداة بالديمقراطيه ومحاسبة الذين انقلبوا عليها او افسدوا وأثروا تحت جناحها..
.وتاتي اليوم بلا حياء تفكر في العمل السياسي حتما الترشيح غدا.....لتقدم لنا ماذا؟؟.لتقدم لنا الانقاذ بوجهها الاول الذي صنعته..ام بوجه جديد اكثر بطشا وافسادا..

.ولسنا هنا لمحاكمة نواياك او مافي القلوب...فربما هداك الله من رجس الديكتاتوريات ونهب ثروات شعبنا وانشاء بيوت الاشباح.....ولكننا نحاكم تاريخك الذي تريد تخلعه وتلبس ثياب الديمقراطيه.... نقول لك ..ان تاريخك الذي لم تعتذر عنه ولم تستغفر شعبنا بسببه منحوت في ذاكرتنا..... فان حاولت خلعه فأثره باقي وهو الذي يجعلنا لا نري فرقا بينك وبين البشير....فانتم وجهان لعملة واحده..والانقاذ انت جزء منها وان فارقتها لانها جزء من فكرك فعاشت بك ومعك واستقرت بين المسام. فأي تفكير في التوبه لامعنى له لو لم تعتذر لشعبنا على ما إقترفت يد الإنقاذ وقدمت للعدالة ما تعلم من مفاسد البطش والتعذيب والتمكين.. فلن يكفيكم تغيير جلدكم لتدخلوا ساحة الشرفاء بل عليكم ان تنزعوا هذا الجلد وإرثه بكل ما شارك وشاهد من موبقات وتضعوها في ميزان العدالة والقصاص قبل ان تحلموا بالتعافي والغفران..
ولا اقول لك سوى..ان تسمع لنصيحة خالتنا حاجه التومه لي عباس ودالحرم..ربما تعي بما يمر بقلوبنا المجروحه ............................

عباس ود الحرم ما كان زول مدارس من هو طفل كان سارح وبيرعى بي البهايم

وبرع في علاج البهايم وتوليد الغنم....عشان كده هدومه دايما ملطخه بي روث البهايم وصوف الغنم

لمن كبر خلى الرعي وإشتغل في الدباغه والحال ياهو الحال اليوم كله بين الجلود والقطران

وفوق لي ده علاقته بي الحمام والنضافه ما حميمه...كان ما قلنا مقطووعه تماما

هي مرتين في السنه ...في الأعياد....قبل الصلاه بياخد ليهو غطسه في البحر قبل ما يلبس جلابية العيد

عشان كده ريحته كانت صعبه ...قاسيه.... ونفاذه ....مميزه بترمي الصقر ....وتقيله بتسبقه وبتقعد معاه ولمن يفوت بيخلي جزء منها وراهو...بتطفش الرجال من السلام عليهو...قالوا سلم على حاج الخير لمن جأ من الحج بالأحضان المسكين كان داير يضيعوا ....قامت عليهو الأزمه ولمن رقدوهوا إسبوع في الاسبتاليه وأخد ليهو أكسجين و كورس بتاع حقن بنسلين حتى شم العافيه

في الجامع تلقاهوا واقف في الصف برااه ......ولو دخل على أي بيت في الحله أثره وريحته بتقعد وراه كان يوم يومين وما بتروح بي فتيح الابواب ولا الدخان ولا البف باف

في يوم ...................جأ لي خالته حاجه التومه لابس جلابية العيد وقال ليها تمشي معاه عشان يخطب نفيسه بت حاج الطريفي
قالت ليه والله ياولدي أسمع كويس ما تتعب نفسك ساكت........وأسمع النصيحه دي من خالتك........................
عرسا في الحله دي ما شايفاهو ليك ...والله ياولدي كان البت بايره وغبيانه وعويره وما شافتك ووافقت.........أهلها ما حيوافقوا
يا ولدي إنت ما نصيح.............. ريحتك دي يعيشوا معاها كيف؟؟؟؟؟؟؟
والله يا ولدي لو عطونك في البحر لي شهر بي حولوا .....وقفلوك حول كامل ودعكوك بالدلكه والخمره ما بغير شئ
مش كده والله يا ولدي لوربنا من سماهو غير ليك جلدك وخلى عرقك مسك ونفسك فليردمور....برضه ما بحلك
يا ولدي الريحه دي ما في النخره...دي بقت في القلب.. الحمام وتغيير الجلد ما بروحوها.....والله ياولدي أنا خالتك لو شفتك في حلمي في المنام بصحي نفسي مكتوم من العفنه.....
ماتتعب نفسك الحصل حصل ............................ريحتك ياولدي ما جلابية تلبسها وتقلعها...دي في العضم
نصيحتي ليك .....
..يا تنسى العرس مره واحده وتبقى زول آخره........يا تنسى ناس الحله دي وتشوف ليك حلة تانيه بعييده يكونوا ما بعرفوك عشان تاني يفكروا يدوك بنتهم..

مجدي إسحق

////////////////////